შსს: ენგურის ხიდზე აქციის მონაწილე ორი მუხლით დავაკავეთ
აქციის მონაწილე ენგურის ხიდზე, სადაც მძღოლები დილიდან გაიფიცნენ, გზის გადაკეტვას შეეცადა, თუმცა სამართალდამცველებმა მას ამის შესაძლებლობა არ მისცეს.
ენგურის ხიდზე ოთხთვალა ურმების მფლობელები გაიფიცნენ, რომლებსაც მოსახლეობა ხიდის დასაწყისიდან ბოლომდე მიჰყავდათ. მათთან ერთად საპროტესტო აქციას მართავენ ტაქსის და მიკროავტობუსის მძღოლები, ისინი, ვინც მოქალაქეებს რუხიდან ენგურის ხიდამდე, ან ზუგდიდის ბაზრიდან ემსახურებოდნენ. მათი განცხადებით, არ ეძლევათ მუშაობის საშუალება, რადგან არაოფიციალურად აქ სამი მიკროავტობუსი დადის, რომელიც ე.წ ტყის ძმების მეთაურის, დათო შენგელიას საკუთრებაა. ის კი, განმარტავენ, რომ დე ფაქტო ხელისუფლების წარმომადგენლებთან შეკრულია და გარკვეულ თანხას აძლევს მათ. შედეგად თავად ოჯახები ულუკმაპუროდ რჩებათ. ისინი თანაბარ უფლებას და შესაძლებლობას ითხოვენ მუშაობისთვის.
სვანეთის კოშკთან მდებარე ავტოსადგურის წარმომადგენელმა არსენა ჩანგელიამ მძღოლების პრეტენზიებს უკვე უპასუხა. მისი თქმით, სწორედ მოსახლეობის მოთხოვნა იყო არსებულიყო ზუგდიდის ცენტრიდან მიკროავტობუსი, რომელიც ხიდის ბოლომდე გადაადგილდებოდა. განმარტა, რომ დაახლოებით ოთხი თვეა ოთხი მიკროავტობუსი დაინიშნა, რომელიც აღნიშნული მიმართულებით მოძრაობს.
არსენა ჩანგელიამ შეკრებილთა გაფიცვას პროვოკაცია უწოდა და აღნიშნა, რომ არ აქვს მნიშვნელობა, ვისი ხელმძღვანელობით მოხდება მგზავრების ტრანსპორტირება, იქნება ეს დათო შენგელიას, თუ სხვა პირის მიერ, მთავარია ხალხისთვის სასიკეთო საქმე გაკეთდა. მისივე განმარტებით, 21-ე საუკუნეში მოსახლეობას არ უნდა მოუწიოს ოთხთვალა ურმებით მოძრაობა.