პროკურატურა ანაკლიელი გურამ თირქიას საქმეზე: აქტიური საგამოძიებო მოქმედებები მიმდინარეობს
გურამ თირქია ამბობს, რომ მიწის საქმეს, რომელზეც ანაკლიაში სახლი უდგას და ოჯახით ცხოვრობს, პროკურატურაში უკვე მეექვსე წელია იძიებენ. 4 ჰექტარი ფართობი იმ ტერიტორიაზეა მოქცეული, სადაც პორტის მშენებლობა უნდა დაიწყოს. მოქალაქის თქმით, ის არავის მისცემს უფლებას, გამოძიების დასრულებამდე აქ რაიმე ტიპის სამუშაოები აწარმოონ.
„ჩემს ტერიტორიაზე მე არ შემოვუშვებ ტექნიკას. ჩვენ შვიდნი ვართ ოჯახში. აქედან წასვლას არ ვაპირებ. როცა ტექნიკა შემოვა, წინ გადავუდგები და რომ გადამივლიან, ხალხიც ნახავს ამას“, - აღნიშნა გურამ თირქიამ.
მის მსგავსად კომპენსაციას შპს „ედელვაისის“ ხელმძღვანელი მადონა ლაშხიაც ითხოვს.
ანაკლიაში, მოქალაქეების მიერ მიწის კომპენსაციის მოთხოვნას სახელმწიფო ქონების ეროვნულ სააგენტოში უპასუხეს. მათი განმარტებით, ისინი მოქმედებენ მხოლოდ სასამართლოს გადაწყვეტილების შესაბამისად, ამიტომ, ვიდრე გურამ თირქიას შემთხვევაში არ დადგინდება სადავო მიწის ნაკვეთის კანონიერი მესაკუთრის ვინაობა, ანაზღაურებაზე საუბარი ვერ იქნება. რაც შეეხება მადონა ლაშხიას, რომელსაც 2006 წელს შეძენილი მიწის ნასყიდობის ხელშეკრულება 2010 წელს გაუუქმდა უზენაესი სასამართლოს გადაწყვეტილების საფუძველზე, ის კომპენსაციას ვერ მიიღებს.