მუჟავაში გარდაცვლილი ჯარისკაცის დედა: შვილი მიზანმიმართულად მომიკლეს [ვიდეო]
დღესვე სასამართლომ იმსჯელა მისთვის აღმკვეთი შეფარდების ღონისძიებაზე, კერძოდ პატიმრობაში დატოვებაზე. მოსამართლე ნატრული აკობიამ დააკმაყოფილა პროკურატურის მოთხოვნა, რომლის განმარტებითაც, მიუხედავად იმისა, რომ ბრალდებული აღიარებს დანაშაულს, არსებობს გამამტყუნებელი განაჩენის დადგომის შიშით მიმალვის საფრთხე. ამიტომ, მოსამართლემ არ გაითვალისწინა ბრალდებულის ადვოკატ, ნინელი ქოიავას შუამდგომლობა, 10 ათასი ლარის ოდენობის გირაოს სანაცვლოდ გათავისუფლების შესახებ.
სასამართლო სხდომაზე პროკურორმა დავით პაპავამ წარმოადგინა მტკიცებულებების ნუსხა, მათ შორის მოწმეთა სია, მათი დაკითხის ოქმები, დაზარალებულთა დაკითხვის ოქმებთან ერთად. ასევე, სხვადასხვა ექსპერტიზის დასკვნა, გარდაცვლილის და ბრალდებულის როგორც ტანსაცმლიდან აღებული ნიმუშები, ასევე სისხლის. იმის გამო, რომ ეს მტკიცებულებები სადავოდ არ მიიჩნია დაცვის მხარემ, მხარეთა პოზიციის მოსმენის შემდეგ სასამართლომ მიიღო გადაწყვეტილება მათი გამოკვლევის გარეშე საქმის მასალებზე დართვის შესახებ.
მოსამართლე ნატრული აკობიამ ოჯახს მომხდარის გამო მიუსამძიმრა და აღნიშნა, რომ ეს მთელი ქვეყნის ტრაგედიაა. მანვე მიმართა ოჯახის წევრებს თხოვნით, მიუხედავად მძიმე ემოციური მდგომარეობისა, სხდომის დარბაზში სიმშვიდე შეინარჩუნონ.
ოჯახმა პროცესის დასრულების შემდეგ პროტესტი გამოთქვა იმის გამო, რომ ადვოკატს ჰქონდა შეთავაზება ბრალდებულის გირაოს სანაცვლოდ გათავისუფლების თაობაზე. აღნიშნეს - რომ არა მოსამართლე ნატრული აკობია, შესაძლოა სხვა მოსამართლეს მიეღო საწინააღმდეგო გადაწყვეტილება. ოჯახის წევრებისვე თქმით, მათ არ სჯერათ ბრალდების მხარის პოზიციის, რომ რაც მოხდა, გაუფრთხილებლობის შედეგია. გარდაცვლილის დედამ იზა რუსიამ აღნიშნა, რომ შვილი მიზანმიმართულად მოუკლეს.
ოჯახის ადვოკატის, როლანდ შონიას განმარტებით, სინამდვილეში ახალგაზრდა გაცილებით მძიმე დანაშაულის დაფარვის გამო მოკლეს.
ოჯახი საგუშაგოს უფროსის, ალექსანდრე კვიჟინაძის დაკავებას ითხოვს, რადგან მათი თქმით, იარაღი, საიდანაც გასროლა განხორციელდა, სწორედ მას ეკუთვნის.
საქმის არსებითი განხილვა 30 იანვარს გაიმართება.
წალენჯიხის მუნიციპალიტეტში, მუჟავა- ლეკუხონას ადმინისტრაციული საზღვრის სიახლოვეს, თბილისის მიერ კონტროლირებად საგუშაგოსთან რიგითი ჯარისკაცი გასროლის შედეგად 26 ოქტომბერს გარდაიცვალა.
მუჟავაში გამგებლის წარმომადგენელმა მამუკა ჩხაპელიამ მაშინ „ლაივპრესს“ უთხრა, რომ ერთ-ერთ სამხედროს ცეცხლსასროლი იარაღი შემთხვევით გაუვარდა და ტყვია მეორე სამხედრო მოსამსახურეს მოხვდა. მამუკა ჩხაპელიასვე ცნობით, გამოიძახეს სასწრაფო დახმარება, თუმცა დაჭრილის გადარჩენა ვერ მოხერხდა.
მომხდართან დაკავშირებით გამოძიება 116-ე მუხლით დაიწყო, რაც სიცოცხლის გაუფრთხილებლობით მოსპობას გულისხმობს.