ვაი თქვენს პატრონს - მიხეილ ხუბუტიას პასუხი ზუგდიდის მერიას
მასში ადგილობრივი ხელისუფლების წარმომადგენელი მადლობას უხდის ბიზნესმენს ინიციატივისთვის, თუმცა პარარელურად უხსნის მათი მხრიდან უარის მიზეზსაც - რომ პრემიერ-მინისტრი მამუკა ბახტაძე ზუგდიდელებს დაჰპირდა ოლიმპიური სტანდარტების საცურაო აუზის მშენებლობას. ამავე წერილის მიხედვით, მერია მიხეილ ხუბუტიას ალტერნატიული წინადადების სახით, ცაიშთან ახლოს ავტოდრომის მშენებლობას სთავაზობს. გია გულორდავა წერს, რომ მიწის ნაკვეთს ბიზნესმენს უსასყიდლოდ გადასცემენ.
წერილის ავთენტურობას მერის მოადგილე „ლაივპრესს“ უდასტურებს. მისი განმარტებით, ზუგდიდში ორი საცურაო აუზის მოწყობის აზრს ვერ ხედავენ, ავტორალისთვის ტრასის აშენება კი ახალგაზრდების მოთხოვნაა, რადგან სპორტის ეს სახეობა მათში პოპულარულია.
„ქალაქშიც დაქრიან მანქანები, რომლებსაც სპორტულად გადაკეთებული ძრავები უყენიათ. ძალიან სწრაფად დადიან. რადგან ახალგაზრდების მოთხოვნაა, მას უნდა დროულად მიხედვა, რომ არ გადაიზარდოს უკონტროლო სიტუაციაში. ეს იმიტომ, რომ ხდება ავტოსაგზაო შემთხვევებიც. შარშან ერთი მოტოციკლისტი დაიღუპა“, - გვითხრა გია გულორდავამ.
თუ რატომ არ შესთავაზეს მიხეილ ხუბუტიას მაგალითად მიუსაფარ ცხოველთა თავშესაფრის მოწყობა, რომელიც ერთ-ერთი პრობლემაა მუნიციპალიტეტისთვის, აღნიშნა - ეს ორი ცოტა განსხვავებული თემებია - „თავშესაფრის თემით ალბათ სხვები არიან დაკავებული. მიდის ამ მმართულებით მუშაობა“.
მერის წარმომადგენლისვე თქმით, საცურაო აუზის მშენებლობის სურვილი თავად ბიზნესმენმა გამოთქვა და ისინი აღნიშნულ საკითხზე სასაუბროდ ერთმანეთს პირისპირ შეხვდნენ კიდეც, ხუბუტიას ზუგდიდში ყოფნისას, პირველი საჯარო სკოლის 150 წლის იუბილემდე.
თუმცა ბიზნესმენის ინიციატივის შესახებ რომ ინფორმირებულები არ იყვნენ, ეს უფრო ადრე „ლაივპრესს“ საკრებულოს თავმჯდომარემ და მერმა განუცხადეს. ასე რატომ მოხდა, გია გულორდავამ განმარტა:
„ეს იყო პირადული შეხვედრა ნაცნობობიდან გამომდინარე. ერთი სკოლა დავამთავრეთ“.
მიხეილ ხუბუტია სოციალურ ქსელში მის მიერ გია გულორდავასთვის გაგზავნილ საპასუხო წერილსაც აქვეყნებს, სადაც ვკითხულობთ:
„დიდი მადლობა წინადადებისთივის, მაგრამ მე თვითონ ვარ მასწავლებელი მოწოდებით და ჩემი სურვილით! მიყვარს ბავშვებთან ურთიერთობა და უანგაროდ დახმარება! ზუსტად ამიტომ გთხოვეთ ბასეინის გაკეთება ჩემი სახსრებით, და არა გასართობი ავტორალის მოყვარულებისთვის! მიხარია, რომ პრემიერ-მინისტრმა ჩემს მერე გამოთქვა სურვილი და აშენდება ბავშვებისთვის საცურაო აუზი! იმედია შემდეგში უკვე თქვენი ინიციატივით შეკრებთ ზუგდიდელ ემიგრანტებს და შევიტანთ წვლილს ჩვენი მშობლიური ქალაქისთვის“.
მიხეილ ხუბუტია სოციალურ ქსელში ასევე წერს შემდეგს - „ნორმალური ადამიანი აქეთ მომეფერებოდა, გამაკეთებინებდა!“.
ბიზნესმენი ამბობს იმასაც, რომ ასეთი წერილისთვის წინა ხელისუფლება თანამშრომელს არც გააჩერებდა. მანვე დაწერა იმ შეთავაზებებზე, რაც ზუგდიდში ადგილობრივი ხელისუფლების წარმომადგენლების მიმართ ქონდა. კერძოდ, ითხოვა საბჭოს შექმნა და თავად ჩამოიყვანდა ინვესტორებს ყველა ქვეყნიდან. ასევე 20-30 ჰექტარი მიწის ყიდვა სამუშაო ადგილების შესაქმნელად. ხუბუტიასვე თქმით, გადასამუშავებელი მიწები უკვე ნაყიდი აქვს. ბიზნესმენის ინიციატივა იყო ასევე ბევრი ნერგის შეძენა მისი მხრიდან, რომლებსაც ზუგდიდელები განსაზღვრულ ტერიტორიაზე დარგავდნენ და მცენარეებს საკუთარ სახელებს შეარქმევდნენ.
„ჩემს თანხას ვერ მოაკლდება და არ არის ალბათ საინტერესო“, - წერს მიხეილ ხუბუტია.
ზუგდიდში ოლიმპიური სტანდარტების საცურაო აუზის მშენებლობის სურვილი გამოთქვა რუსეთში მოღვაწე ბიზნესმენმა და პუტინთან დაახლოებულმა მიხეილ ხუბუტიამ, რომელიც პირველი საჯარო სკოლის 150 წლის იუბილეს ესწრებოდა. მისი თქმით, როგორც კი ხელისუფლება გამოყოფს ტერიტორიას ხუბულავას ქუჩაზე, ის ერთ წელიწადში ამ აუზს ააშენებს.