გარევაჭრობის მოსაწესრიგებლად ზუგდიდში სამუშაო ჯგუფი შეიქმნა
„ეს არის ძალიან მტკივნეული საკითხი. ის, რა მდგომარეობაშიც დღეს გარევაჭრობა ხდება, ყოვლად მიუღებელია, მაგრამ უნდა გავითვალისწინოთ იმ ადამიანთა მდგომარეობა, რომლებიც ამ საქმიანობით ლუკმა-პურს შოულობენ. სამუშაოს ჯგუფის მიზანია, მათ შევთავაზოთ ისეთი სავაჭრო ადგილები, რომლებიც მათთვის მისაღები იქნება და კონსესუსის შედეგად მივაღწიოთ ისეთი დოკუმენტის მიღებას, რომლითაც ყველა დაინტერესებული პირი იქნება კმაყოფილი“,- განაცხადა საკრებულოს თავმჯდომარე მამუკა წოწერიამ დღეს გამართულ სხდომაზე.
ზუგდიდის ბაზრის მიმდებარედ აკრძალვის მიუხედავად, გარევაჭრობა ახლაც გრძელდება. მოვაჭრეების განცხადებით, მდინარე ჩხოუშის პირას მათთვის შეთავაზებული ადგილი სამუშაოდ მიუღებელია, რადგან წვიმის შედეგად იტბორება.
ზუგდიდის ბაზრის გარეთა პერიმეტრზე დასაქმებულმა მოვაჭრეებმა გარევაჭრობის დაშვების მოთხოვნით საპროტესტო აქცია არაერთხელ გამართეს. ბოლოს, ერთკვირიანი აქცია მათ თებერვალში ჰქონდათ.