ანაკლიაში ქალის გაუპატიურებაში ბრალდებულს პატიმრობა შეეფარდა
დაკავებულის სასამართლო პროცესი სრულად დაიხურა. სხდომის იმ ნაწილში, სანამ მოსამართლე დააკმაყოფილებდა მხარეების მოთხოვნას დახურვის შესახებ, ბრალდებული არ გამოცხადდა. ადვოკატმა გვანცა შელიამ ჟურნალისტებს უთხრა, რომ მას არ სურს მოხდეს მისი იდენტიფიცირება. სწორედ ამ მიზნით, დააყენა მან პროცესების სრულად დახურვის შუამდგომლობა, რასაც პროკურორი მაია ჯაბუა დაეთენხმა. მოსამართლე მანუჩარ ცაცუამ შუამდგომლობა დააკმაყოფილა. აღნიშნა, რომ გასათვალისწინებელია მსხვერპლის ინტერესები.
1995 წელს დაბადებული ირანის მოქალაქე სამართალდამცავებმა 28 აგვისტოს დააკავეს. შინაგან საქმეთა სამინისტროს ინფორმაციით, ბრალდებულმა მიმდინარე წლის 27 აგვისტოს, ზუგდიდის რაიონის სოფელ ანაკლიაში, თ.ტ-სთან, მისსავე დროებით საცხოვრებელ ბინაში, სქესობრივი კავშირი იძულებით დაამყარა და შემთხვევის ადგილიდან მიიმალა. სამართალდამცველებმა ბრალდებული შემთხვევიდან რამდენიმე საათში, თბილისის საერთაშორისო აეროპორტში მაშინ დააკავეს, როცა ის ქვეყნის დატოვებას ცდილობდა. გამოძიება გაუპატიურების ფაქტზე, საქართველოს სისხლის სამართლის კოდექსის 137-ე მუხლით მიმდინარეობს, რაც თავისუფლების აღკვეთას 6-დან 8 წლამდე გულისხმობს.