სამეგრელოში ცხოველთა თავშესაფრის მშენებლობა მომავალ წელს იგეგმება
სამინისტროს განმარტებით, მუნიციპალური თავშესაფარი არაკომერციული დაწესებულებაა, რომელიც უზრუნველყოფს ცხოველთა პოპულაციის მართვას, კომპანიონი კი არის ცხოველი, რომელიც ადამიანს ჰყავს ესთეტიკური თუ სოციალური მოთხოვნილებების დასაკმაყოფილებლად. ის ექვემდებარება ადამიანის მხრიდან მოვლას და პატრონობას.
მათივე ცნობით, თავშესაფარი განთავსდება შემოღობილ ტერიტორიაზე და აღიჭურვება ადმინისტრაციული და კარანტინის შენობებით, ვეტერინარული კლინიკით, ლაბორატორიით, ვოლირებითა და ყველა სხვა აუცილებელი ინფრასტრუქტურით.
სამინისტროში ამბობენ, რომ საერთაშორისო სტანდარტის თანახმად, თავშესაფარში აუცილებელია ხუთი ძირითადი თავისუფლების პრინციპის დაცვა - წყურვილის და შიმშილისგან თავისუფლება, დისკომფორტისგან თავისუფლება, ტკივილის, ჭრილობის და ავადმყოფობისგან თავისუფლება, თავისი სახეობისთვის დამახასიათებელი ნორმალური ქცევის განხორციელების თავისუფლება, გადაადგილების თავისუფლება, შიშისგან და სტრესისგან თავისუფლება.
თავშესაფარი ვალდებული იქნება აწარმოოს ცხოველთა აღრიცხვა და უზრუნველყოს მათი ბრუნვის ამსახველი სტატისტიკა, ყველა ცხოველის სტერილიზაცია და ვაქცინაცია. ასევე, ცხოველის პატრონის დადგენის, ან ახალი პატრონის მოძიების მიზნით საჭირო ღონისძიებების განხორციელება, ცხოველთა დაცვის ორგანიზაციებთან ერთად ცხოველებზე ზრუნვისკენ მიმართული საინფორმაციო კამპანიების წარმოება.
მიუსაფარ ცხოველთა თავშესაფრის მშენებლობის საკითხი აქტუალური თემაა ზუგდიდის და მთლიანად, სამეგრელო-ზემო სვანეთის რეგიონისთვის.
სახელმწიფო რწმუნებულის ადმინისტრაციამ მაწანწალა ცხოველების თავშესაფრის მშენებლობაზე მუშაობა მას შემდეგ დაიწყო, რაც ზუგდიდის მერიამ განაცხადა, რომ თავშესაფრის მშენებლობისთვის მომავალი წლის ბიუჯეტში თანხა არ არის. გუბერნიის პრესსამსახურში „ლაივპრესს“ განუცხადეს, რომ ცხოველებისთვის ინტერმუნიციპალური თავშესაფრის მშენებლობაზე მუნიციპალური განვითარების ფონდთან კონსულტაციები უკვე მიმდინარეობს. თავის მხრივ, ფონდში მოლაპარაკების წარმოებას ადასტურებენ, თუმცა ჯერ კონკრეტულს ვერაფერს ამბობენ.