შსს: შევისწავლით ინციდენტის ამსახველ კადრებს და იქნება სამართლებრივი რეაგირება
უწყების თქმით, მიუხედავად გაფრთხილების, ალტერნატიული მარშრუტის და ტრანსპორტის შეთავაზებისა, შეკრებილები არ დაემორჩილნენ პოლიციის კანონიერ მოთხოვნებს, გადაუხვიეს შეთავაზებულ მარშრუტს, დაიწყეს ღია დაპირისპირება და ძალადობა პოლიციასთან.
„პოლიციის მიერ შესწავლილი იქნება თითოეული ინციდენტის ამსახველი ვიდეოკადრები, ასევე გამოიკითხებიან მოწმეები, რის შემდგომაც მოხდება ინციდენტების სამართლებრივი შეფასება და შესაბამისი რეაგირება“, - აცხადებენ სამინისტროში.
მათივე განმარტებით, თელავს საქართველოს პრეზიდენტის ინაუგურაციასთან დაკავშირებით, მაღალი რანგის პირები სტუმრობენ, დელეგაციები, სწორედ ამიტომ, მათი უსაფრთხოების დაცვის მიზნით მიიღეს შესაბამისი ზომები.
შინაგან საქმეთა სამინისტრო კიდევ ერთხელ მოუწოდებს აქციების ორგანიზატორებს, დაიცვან მართლწესრიგი და დაემორჩილონ პოლიციის კანონიერ მოთხოვნებს.
ოპოზიცია აცხადებს, რომ თუ მათ მანქანებით არ გაუშვებენ, თელავში ფეხით ჩავლენ.
„არ ვიცი, მოვასწრებთ თუ არა თელავამდე ფეხით ჩასვლას, მაგრამ ამ ხელისუფლებას რომ დავამხობთ კანონიერი გზით, ამას ნამდვილად მოვასწრებთ, - განაცხადა „ნაციონალური მოძრაობის“ ერთ-ერთმა ლიდერმა და გაერთიანებული ოპოზიციის პრეზიდენტობის კანდიდატმა გრიგოლ ვაშაძემ.
აქციის მონაწილეთა განმარტებით, ენმ-ის წევრებს თელავში მისასვლელი გზები ჩაუკეტეს, რის გამოც „მოჰპარეს“ გადაადგილების თავისუფლება.
სალომე ზურაბიშვილის ინაუგურაცია დღეს ზუგდიდსა და ქვეყნის სხვა ქალაქებში გააპროტესტეს.