ბუტა რობაქიძის საქმეზე ბრალდებული პირები სასამართლომ დამნაშავედ სცნო
გურამ დონაძეს სასჯელის სახით 5 წლითა და 3 თვით ვადით მიესაჯა პატიმრობა. თანამდებობის დაკავება მას 2 წლით და 3 თვის ვადით აეკრძალა.
დავით იაშვილს სასჯელის სახით განესაზღვრა 5 წლითა და 3 თვის ვადით პატიმრობა. თანამდებობის დაკავება მას 2 წლითა და 3 თვის ვადით აეკრძალა.
ზურა მიქაძეს სასჯელის სახით 6 წლით და 3 თვის თავისუფლების აღკვეთა განესაზღვრა. მას აეკრძალა თანამდებობის დაკავება 2 წლით და 3 თვით.
ირაკლი ფირცხალავას სასჯელის სახით თავისუფლების აღკვეთა 5 წლით და 3 თვის ვადით შეეფარდა. 2 წლით და 3 თვის ვადით სახელმწიფო აეკრძალა თანამდებობის დაკავება.
ზაზა ბაქრაძეს საპროცესო შეთანხმება გაუფორმდა და სასჯელის სახით განესაზღვრა პირობითი მსჯავრი 4 წლითა და 6 თვის ვადით, ასევე ჯარიმა 5 000 ლარის ოდენობით. თანადებობის დაკავების უფლება მას 2 წლით ჩამოერთვა.
შინაგან საქმეთა სამინისტროს ყოფილი მაღალჩინოსნები გურამ დონაძე, ზურა მიქაძე და დავით იაშვილი სხდომათა დარბაზშივე დააკავეს, ირაკლი ფირცხალავა კი სხვა საქმეზე უკვე მსჯავრდებულია.
ბუტა რობაქიძის დედა ია მეტრეველი მოსამართლის გადაწყვეტილებას გამოეხმაურა. მისი თქმით, ამ გადაწყვეტილების შემდეგ საქართველოში სამართლიანობის დამკვიდრება იწყება.
„ძალიან სამართლიანი გადაწყვეტილება მიიღო მოსამართლემ. მან ყველას მიუსაჯა უმაღლესი სასჯელი რაც ეკუთვნოდათ. თუმცა, ამინისტიის მუხლები შეეხოთ და შეუმცირდათ სასჯელები. თითოეულს გამოუვიდა 5 წელი, რაც მათთვის ცოტაა, მაგრამ მე ამაზეც კმაყოფილი ვარ იმიტომ, რომ გამოსცადონ ის რაც დააშვეს.
ბევრად მეტი ეკუთვნით, თუმცა ვფიქრობ, რომ დღეიდან საქართველოში სამართლიანობის დამკვიდრება იწყება” – თქვა ია მეტრეველმა.