სპორტი
დავით ქირია სამგზის მსოფლიო ჩემპიონობისთვის ემზადება - ინტერვიუ [ვიდეო]
PLAYER_GET_VIDEOFLASH
ზუგდიდელი კიკბოქსიორი დავით ქირია მსოფლიო ჩემპიონატის ნახევარფინალისთვის მზადებას განაგრძობს. როგორი იყო გზა ბავშვური გართობიდან პროფესიულ კარიერამდე მსოფლიოს ორგზის ჩემპიონისთვის, როგორი განწყობით და მოლოდინებით ხვდება მოახლოებულ შეჯიბრს, რა სამომავლო გეგმები აქვს, სპორტსმენს „ლაივპრესი“ ესაუბრა.

ლაივპრესი: როდის გქონდათ პირველი შეხება სპორტის ამ სახეობასთან და რატომ დაინტერესდი კიკბოქსინგით?

დავით ქირია: სპორტში ბავშვობიდან ვარ ჩართული. ჯერ ცეკვაზე დავდიოდი, მერე ფეხბურთზე, მაგრამ გუნდური სპორტი რაღაც არ მომწონდა. ბაჩო (ბაჩუკი ფარცვანია - პირადი მწვრთნელი) ჩემი მეზობელია. ვიცოდი, რომ მას ჰქონდა ჯგუფი და დავიწყე ვარჯიში. ცხრა წლიდან ბაჩოსთან ვვარჯიშობ და დღემდე ერთად მოვდივართ. რამდენიმე წარმატებული შეჯიბრი იყო ჩემთვის სტიმული და ასე დავრჩი სპორტში.

ლაივპრესი: თავდაპირველად სპორტი უბრალო გართობის საშუალება იყო თქვენთვის?

დავით ქირია: ბავშვობაში შეიძლება ვერც აცნობიერებდე, რას ნიშნავს სპორტი შენთვის, ჰობია თუ არა. ჩვენ ისეთი ბავშვობა გვქონდა, ბევრი გასართობიც არაფერი გვქონდა. ეტყობა სპორტი იყო განმუხტვის ერთ-ერთი საშუალება. ავტომატურად ვარჯიში დავიწყე და ასევე, ალბათ შინაგანად მქონდა სპორტის მიმართ სიყვარული.

ლაივპრესი: როდის მიხვდი, რომ ეს საქმე მეტი იყო, ვიდრე გართობა და პროფესიად გექცა?

დავით ქირია: ალბათ უფრო 14-15-16 წლიდან, იმიტომ, რომ იმ დროს გარდატეხის პერიოდი გაქვს და უყურებ ასე - ან ჰობი, ან პროფესია. ფიქრობ, თუ რისი კეთება გინდა. მაშინ მართლა დავრწმუნდი, რომ ნამდვილად მინდოდა ამ სპორტში დარჩენა. უკვე გამოცდილი სპორტსმენი ვიყავი, რადგან 200-ზე მეტი ბრძოლა მქონდა კარატეში ჩატარებული. თავიდან კარატეზე დავდიოდი. 17 წლიდან გადავწყვიტე, მონაწილეობა მიმეღო კიკბოქსინგში. ყველაფერი, ჩემი დრო, ენერგია, მონდომება, მოტივაცია ჩავდევი მასში.

ლაივპრესი: პირველი გამარჯვება როდის იყო?

დავით ქირია: პირველად წავაგე. ქუთაისში, შეჯიბრზე წამიყვანეს ბავშვობაში. კარგად ვიჩხუბე, მაგრამ სულ რაღაც სამი თვის დაწყებული მქონდა ვარჯიში. ფიზიკურად დიდი იყო და მომიგო.

ლაივპრესი: პირველი მნიშვნელოვანი გამარჯვება შენს კარიერაში როდის გახსენდება?

დავით ქირია: ეს იყო ჰოლანდიაში, 2007 წელს. ეს პირველი საერთაშორისო ტურნირი იყო ჩემთვის, რომელმაც შემდეგ მთელს ჩემს კარიერაზე იქონია გავლენა, რადგან კიკბოქსინგი არის უფრო კომერციული სპორტი, სადაც გაკვირდებიან პრომოუტერები, მენეჯერები. დიდი დაინტერესება გამოიწვია ჩემმა ბრძოლამ, რადგან ვიყავი საკმაოდ ახალგაზრდა, 19 წლის. ვიბრძოლე პროფესიონალებში. პირდაპირ დავიწყე „ა“ კლასში ბრძოლა. ასე მოხდა ჩემი კარიერის გაგრძელება ევროპაში.

ლაივპრესი: დღეს მსოფლიოს ორგზის ჩემპიონი ხარ. ყველაზე დიდი სირთულე რა შეგხვდა პროფესიულ გზაზე?

დავით ქირია: პრობლემები იყო და დღემდე არის. თავიდან ალბათ მაინც ფინანსები, შეკრება, რადგან სამწუხაროდ არ გვქონდა ადგილზე შესაბამისი პირობები, რომ ასეთი მაღალი დონის ტურნირებისთვის მოვმზადებულიყავით. გვიწევდა ჰოლანდიაში წასვლა. ზოგადად, მომზადების პერიოდი ძალიან რთულია. მარტო ფინანსებზე არ არის საუბარი, მთელი შეკრების ჩატარება ძნელია, რადგან ტრამვებზე ბევრი რამაა დამოკიდებული. პრობლემა ბევრი შეიძლება იყოს, მაგრამ მთავარია მიზანი და მონდომება. მე ასი პროცენტით დარწმუნებული ვარ, რომ ვაკეთებ საქმეს, რომელიც მიყვარს. პრობლემა ყოველთვის მარტივად გადასალახია, როცა მიზანი გაქვს და მასზე კონცენტრირებული ხარ.

ლაივპრესი: სხვა პროფესიაზე თუ გიფიქრია?

დავით ქირია: კი, მიფიქრია. ვაპირებ..არ ვიცი რამდენად შევძლებ. მინდა რაღაც პროფესია მივიღო, რადგან საშუალო სკოლის შემდეგ განათლება არ მიმიღია. ვსწავლობდი კოლეჯში, მაგრამ ორი წლის შემდეგ სპორტის გამო შევწყვიტე. ეს იმ პერიოდს დაემთხვა, როცა ჰოალნდიაში დავიწყე სიარული. მინდა პროფესია მივიღო კოლეჯის დონეზე მაინც. თუ არა, მაშინ ჩემს მომავალს მცირებიზნესში განვიხილავ. ასევე ვაპირებ საბრძოლო ხელოვნების აკადემიის გახსნას.

ლაივპრესი: სად იქნება ეს აკადემია?

დავით ქირია: ზოგადად საქართველოში და რა თქმა უნდა ზუგდიდშიც იქნება, იყო და იქნება, რადგან აქ ჩვენ გვყავს გენიალური მწვრთნელი ბაჩუკი ფარცვანია. სწორედ მან გაუხსნა გზა საქართველოს ფაქტობრივად კიკბოქსინგის სამყაროში. ის არის ერთადერთი პიროვნება, რომელმაც პროფესიულ კიკბოქსინგში შედეგი დადო, როგორც მწვრთნელმა. ჩვენამდე არავინ არ იყო პროფესიულ კიკბოქსინგში, არათუ წარმატებული, ანგარისგასაწევიც. მე დარწმუნებული ვარ, რომ ის კიდევ ბევრ ჩემპიონს გაზრდის. ზუგდიდი ყოველთვის დასაბამი იქნება კიკბოქსინგში. გვყავს ძალიან დიდი გუნდი, 30 სკოლამდე კლუბი გვაქვს უკვე საქართველოში. ასე რომ, ეს არ იქნება მარტო ჩემი და ერთი სკოლა, ეს იქნება ერთი დიდი სკოლა საქართველოში.

ლაივპრესი: ყველაზე უხერხული მეტოქე ვინ არის თქვენთვის?

დავით ქირია: იყო ჩემს კარიერაში რამდენიმე უხერხული ოპონენტი, რომლებმაც მომიგეს, მაგრამ რევანშისთვის ყოველთვის მზად ვარ და ვმუშაობ იმისთვის, მათ რომ ვაჯობო. ეს უბრალოდ სპორტული ამბიციაა. გინდა, რომ ყოველთვის საუკეთესო იყო. ასე ვთქვათ, ყველა მეტოქე უხერხულია, რადგან ჩემს წონაში ვარ თითქმის ყველაზე პატარა.

ლაივპრესი: თუ გქონია სურვილი, კონკრეტულ სპორტსმენს არ შეხვედროდი?

დავით ქირია: არა. ჩემი ყველაზე დიდი პლიუსია, რომ ყველა მოწინააღმდეგეს ვაფასებ ერთნაირად. სტატისტიკურად, ის იქნება ჩემზე დაბალი დონის თუ მაღალი, მნიშვნელობა არ აქვს. პატივს ვცემ მათ შრომას და ნიჭს. ეს მოგებას უფრო მიადვილებს. არ შეიძლება არავის აგდება და ასევე გაღმერთება.

ლაივპრესი: ჩვენ ვიცით, რა პირობებში უწევთ აქ ახალგაზრდებს ვარჯიში. ეს ხომ არ არის დამაბრკოლებელი გარემოება მათთვის, რომ სერიოზულად მიუდგნენ სპორტის ამ სახეობას?

დავით ქირია: კარგი იქნება, რომ უკეთესი პირობები იყოს, მაგრამ უარესი პირობებიც გვქონდა. მე მგონი, ქვეყანაში ზოგადად ისეთი სოციალური ფონია, ვერ მოითხოვ ყველა რეგიონსა და ქალაქში უმაღლეს დონეზე პირობების შექმნას. იმედი მაქვს, ადგილობრივი თუ ცენტრალური ხელისუფლება იზრუნებს ამაზე, რადგან მართლა მისახედია. როცა უკეთესი პირობები იქმნება, უკეთესი შედეგებიც იდება.

ლაივპრესი: ვისაუბროთ მიმდინარე მსოფლიო ჩემპიონატზეც კიკბოქსინგში. როგორ ემზადებით შეჯიბრისთვის? მეოთხედფინალური შეხვედრა უკვე იყო, რომელიც მოიგეთ.

დავით ქირია: მომზადება 80%-ით დაწყებული გვაქვს. სავარაუდოდ იანვრის პირველ რიცხვებში იქნება ტურნირი. მომზადებას ვიწყებთ თბილისში და შეიძლება გავაგრძელოთ ჰოლანდიაში. ზუსტად ჯერ არ ვიცი. სამი კვირა დრო კიდევ მაქვს ამისთვის.

ლაივპრესი: თქვენს ბრძოლებს ქართველები თუ ესწრებიან?

დავით ქირია: ჩინეთში ნაკლებად, რადგან ყველა შეჯიბრი სხვადასხვა ქალაქში ტარდება და იქ ქართველებიც ძალიან ბევრნი არ არიან. როცა ევროპაში ტარდება ტურნირები, იქ კი ხშირად მოდიან, ნაცნობებიც და უცნობებიც.

ლაივპრესი: თქვენს ყველა გამარჯვებას დიდი გამოხმაურება აქვს. განსაკუთრებული ემოციებით შეხვდნენ ბრძოლას, სადაც რუსი ანატოლი მოისეევი დაამარცხეთ. მესმის, რომ სპორტი პოლიტიკისგან გამიჯნულია, თუმცა როგორი დამოკიდებულება გაქვთ ამ ყველაფრის მიმართ, როცა საქმე რუს სპორტსმენს ეხება? გულშემატკივრების დამოკიდებულება ვიცით..

დავით ქირია: ეს საზოგადოებაზე მოქმედებს, გულშემატკივრებზე მოქმედებს და მე სწორად მესმის, ასე რატომ ხდება. აპოლიტიკური ადამიანი ვარ, მაგრამ მაქვს ჩემი აზრის დაფიქსირების უფლება. სპორტსმენებს შორის რაც ხდება, ჩვენ გვაქვს მეგობრული ურთიერთობა. პირადად მე ანატოლისთვისთან კარგი ურთიერთობა მაქვს, მაგრამ რინგზე ის არის ჩემი მოწინააღმდეგე და ვიცი, რომ უნდა დავამარცხო. რაც შეეხება ამ რეაქციებს და რუსთან განსაკუთრებულ ყურადღებას, ბუნებრივია, რუსეთთან ჩვენ დაძაბული ურთიერთობა გვაქვს, და როცა ქართველი სპორტსმენი რუსს უგებს, ავტომატურად პოლიტიკურ დატვირთვასაც აძლევენ. მაგრამ მე მე ზოგადად ამით არ ვმანიპულირებ, ან ამით ქულების დაწერას არ ვცდილობ. აგვისტოში დაემთხვა ომის ათი წლისთავს და გულიდან ამოსული სიტყვები ვთქვი, რომ გამარჯვება მივუძღვენი საქართველოს და იმ გმირებს, რომლებმაც თავი გასწირეს ქვეყნისთვის. ჩემი მხრიდან ამას პოლიტიკური დატვირთვა არ ქონდა.უბრალოდ სულით და გულით მივუძღვენი. მეტი არ ვიცი, რისი გაკეთება შემიძლია ამ ადამიანებისთვის.

ლაივპრესი: კიკბოქსინგის გარდა, რა გაინტერესებთ ზოგადად ცხოვრებაში?

დავით ქირია: რა თქმა უნდა, როგორც ყველას, ისე მეც მაქვს ჰობი. მაქვს ძალიან დატვირთული რეჟიმი, რადგან წელიწადში 4-5 ბრძოლის ჩატარება მიწევს მინიმუმ. ძალიან ცოტა დრო მრჩება პირადი ცხოვრებისთვის. მაგრამ რაც მაქვს, მას დიდი სიამოვნებით ვუთმობ ჩემს ოჯახს. მყავს მეუღლე და პატარა შვილი. მიყვარს თევზაობა, პიკნიკებზე სიარული. მაქსიმალურად ვცდილობ, თავისუფალი დრო ამაში დავხარჯო, მაგრამ სამწუხაროდ ვერ ვახერხებ ჯერჯერობით. ორ-სამ წელიწადში ალბათ თავს დავანებებ აქტიურ სპორტს. ზუსტად არ ვიცი, მაგრამ ვნახოთ. უკვე 30 წლის ვარ. სპორტისთვის საკმაოდ ისეთი ასაკია..

ლაივპრესი: რას ელოდებით მსოფლიოს მიმდინარე ჩემპიონატისგან და რას უნდა ელოდონ გულშემატკივრები თქვენგან?

დავით ქირია: როგორც სპორტსმენი და მაქსიმალისტი, ერთადერთზე ვფიქრობ მხოლოდ - გამარჯვებაზე, თუმცა, ეს სპორტია და შეიძლება ყველაფერი მოხდეს. მაგრამ არ შეიძლება ყველაფერზე ფიქრი ჩემთვის. ჩემთვის ერთადერთი საფიქრალი არის ის, რომ ჩემპიონი გავხდე, დავუფასო ყველა ადამიანს ის შრომა, რასაც ჩემში დებენ. ბევრი მგულშემატკივრობს და მე მათი იმედები უნდა გავამართლო. თან ძალიან დიდი შანსი მაქვს, რომ გავიმარჯვო. ასი პროცენტით უნდა დავიხარჯო და შედეგი დავდო.
| Print |  E-mail
FaceBook Twitter Google
სხვა მასალები ამ კატეგორიიდან






ნუგზარ წურწუმია, საქართველო, ოქროს მედლის მფლობელი, - ასე
წარადგინეს
16:01 / 24.11.2018
ნუგზარ წურწუმია, საქართველო, ოქროს მედლის მფლობელი, - ასე წარადგინეს






ხობელი მოჭიდავე ნუგზარ წურწუმია მსოფლიო ჩემპიონი გახდა.
10:18 / 14.11.2018
ხობელი მოჭიდავე ნუგზარ წურწუმია მსოფლიო ჩემპიონი გახდა.






სენაკელი გიორგი ჩხიკვაძე ახალგაზრდული ოლიმპიური თამაშების პირველი
ოქროს მედალოსანია
10:43 / 03.11.2018
სენაკელი გიორგი ჩხიკვაძე ახალგაზრდული ოლიმპიური თამაშების პირველი ოქროს მედალოსანია






სინამდვილეში მეც არ ვიცი რა მოხდა, ვერც ლევანი მიხსნის. რაუნდები
შეუცვალეს
16:55 / 30.10.2018
სინამდვილეში მეც არ ვიცი რა მოხდა, ვერც ლევანი მიხსნის. რაუნდები შეუცვალეს
ლაივპრესის სტუდია
გადაცემა „პირისპირ ლაივპრესთან“ ქალთა მიმართ ძალადობის აღმოფხვრის წინააღმდეგ მიმდინარე 16 დღიან კამპანიას დაეთმო.
ვიდეორეპორტაჟი
დღის ფოტო
ცოცხალი ისტორიები
დემეტრე ლიპარტია - აგრარულ მეცნიერებათა დოქტორი
გრიგოლ დაგარგულია - აგვისტოს ომის რეზერვისტი
დიანა ქაჯაია - აბიტურიენტი
მოცემული ვებ გვერდი „ჯუმლას" ძრავზე შექმნილი უნივერსალური კონტენტის მენეჯმენის სისტემის (CMS) ნაწილია. ის USAID-ის მიერ დაფინანსებული პროგრამის "მედია გამჭვირვალე და ანგარიშვალდებული მმართველობისთვის" (M-TAG) მეშვეობით შეიქმნა, რომელსაც „კვლევისა და გაცვლების საერთაშორისო საბჭო" (IREX) ახორციელებს. ამ ვებ საიტზე გამოქვეყნებული კონტენტი მთლიანად ავტორების პასუხისმგებლობაა და ის არ გამოხატავს USAID-ისა და IREX-ის პოზიციას.
This web page is part of Joomla based universal CMS system, which was developed through the USAID funded Media for Transparent and Accountable Governance (MTAG) program, implemented by IREX. The content provided through this web-site is the sole responsibility of the authors and does not reflect the position of USAID or IREX.
ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდ  ”ღია საზოგადოება-საქართველოს” პოზიციას. შესაბამისად, ფონდი არ არის პასუხისმგებელი მასალის შინაარსზე. The views, opinions and statements expressed by the authors and those providing comments are theirs only and do not necessarily reflect the position of Open Society Georgia Foundation. Therefore, the Open Society Georgia Foundation is not responsible for the content of the information material.