Ажәaбжь ҿыцқәa
Жәыргьыҭ колхидатәи аҩы афестиваль мҩаҧысит [афото]
Жәыргьыҭ ақырҭуа аҩы афестиваль "Диа" имҩаҧысит. Ауснагӡатә аҿы ицәырган колхидатәи ажьхкқәа ирылху аалыҵ. Атәыла еиуеиҧшым акәакьқәа рҟынтәи анаплакҩцәа, афестиваль рхы аладыхәырц азыҳәан, раалыҵ рыманы Жәыргьыҭ инеит. Анаплакҩцәа ишырҳәаз ала, колхидатәи аҩы, европатәи аџьармыкьа аҿгьы ақәҿиара ду аиур ауеит.

Дара "Лаивпресс" акорреспондент ишларҳәаз ала, еиуеиҧшым аҩаӡарақәа рҿы ақәҿира роун, уажәшьҭа, рҩы европатәи аџьармыкьашҟа анагаразы рҽазыҟарҵоит. Дара ражәақәа рыла, колхидатәи аҩы агьама ҷыда амоуп, уи иашаны иҟаҵазар, хымҧада европатәи ахархәаҩцәагьы иргәаҧхоит. Анаплакҩцәа ргәаанагарала, аҩны иҟаҵоу аҩы, аоргантә био аалыҵ зегьы иреиҕьуп. Афестиваль иаҭааз асасцәа аҩы агьама рбеит.

Аҩы ацәыргақәҵа инаваргыланы, афестиваль аҿы иҵегьы имаҷымкәа ақәыҧшыларақәа еиҿкаан. Урҭ иреиуп ашә акәакь, уаҟа ицәырган ирхашҭхьоу ашәхкқәа.Урҭ еиуеиҧшым арегионқәа рҟынтәи иааргеит. Иара убас, еиҿкаан агроқәыҧшылареи, акулинариатә мастеркласс азы ақәыҧшылареи, ачаи ақәыҧшылареи.

Аҧсны иҟаҵоу еиуеиҧшым аалыҵ - аҧсуа аҩи, ачаи, ацхеи, ауаткеи, ахаатәқәеи хазы кәакьк азыркит.

Ауснагӡатә аҿы ицәырган ацхеи, ахаатәқәеи, анаплыхқәеи, аксессуарқәеи. Еиуеиҧшым ансамбльқәа жәлар рашәақәа нарыгӡеит.

Ахәыҷқәа рзгьы ақәыҧшылара еиҿкаан, уаҟа ахәыҷқәа ргәы дырҿыҕьыр рылшон.

Афестиваль ихыркәшан абенд "Иелов" аконцерт ала. Ауснагӡатә еиҿкаан Гыртәыла – Хыхьтәи Шәантәыла аокругтә администрациа ала. Аҳәынҭқарра ахаҭарнак Давиҭ Ҧарцваниа ишиҳәаз ала, колхидатәи аҩи ақырҭуа наплакреи рӡыргара иазкыз ауснагӡатә есышықәса имҩаҧыргоит. Ауснагӡатә даҽа хықәкыкгьы амоуп – аҭыҧантәи анаплакҩцәа рыдгылара.