Амҳаџьырқәа агарашәа ҳәа ззырҳәо „Шьишь нани“ аҧсуа ашәоуп. Уи аҧсуаа рыҧсадгьыл ианықәырцоз ирхыргаз ауадаҩрақәеи рхьааи иазкуп. Мышқәак раҧхьа, амузыкатә проект "Ранина" аҳәаақәа ирҭагӡаны, ақырҭуа ахәаҧшцәа „Шьишь нани“ рзынарыгӡеит 8 шықәса зхыҵуа Анастасиа Гарсеванишвилии ансамбль "Шавнабадеи".

Ари ашәа иазкны адыррақәа иҟоуп. Қырҭтәыла аҳәынҭқарратә фольклортә центр аҿы ишҳарҳәаз ала, „Шьишь нани“ иаҧҵоуп аҧсуа поет Баграт Шьынқәба иажәеинраала ала. Ацентр ауснагӡатәқәа ркоординатор Нино Швелиӡе лажәаақәа рыла, 1953 шықәсазы ақырҭуа композитор Григол Кокелаӡе ари ашәа Очамчыра ианиҵеит. Иара атәыла еиуеиҧшым акәакьқәа рҿы жәлар рашәақәа ианиҵон.

"Зыҧсадгьыл иацәыхароу ауаа ргарашәа, ажәақәа абас ауп ишыҟоу. Аха агарашәа мацароуп ҳәа сызшәаҳәом. Алирикатә ҟазшьа амоуп, егьырҭ агарашәақәа реиҧшҵәҟьа. Ари агарашәа ижәытәӡамзар ҟалап, избанзар Шьынқәба иажәеинраала алоуп ишыҩу", - илҳәеит Нино Швелиӡе.

Лара лажәақәа рыла, дара рархив аҿы ашәа анҵамҭа иҟам. Анотақәа рыла иҩу аверсиа мацароуп ирымоу, избанзар ҧаса анҵаратә хархәагақәа иҟамызт, ауаҩы ашәа аниҳәоз, акомпозитор анотақәа рыла ианиҵон. Аҳәынҭқарратә фольклортә центр аҿы „Шьишь нани“ еиҧшу анҵамҭа иҟоуп.

Алегенда инақәыршәаны, аҧсуаа рыҧсадгьыл иқәҵны инцоз, ан иҧсыз лысаби ари ашәа изылҳәон, ахәыҷы длымхны амшын далармыжьырц азыҳәан. Усҟан аҭырқәцәа, аепидемиа аларҵәара иацәшәаны, иҧсыз зегьы амшын иаларыжьуан.