Ауaaжәлaррa
Акоронавирус ахкҿыц - Қырҭтәыла аглобалтә проблема иаҿагылоит [аинфографика]
FaceBook Twitter
E-mail Print
Акоронавирус ахкҿыц адунеи 166 ҳәынҭқаррақәа рҿы аларҵәара амоуп. Агәабзиарахьчара адунеизегьтәи аиҿкаара ала ари ачымазара пандемиас ирылаҳәоуп. Қырҭтәыла аиҳабыра атәым тәылауаа рзы аҳәаақәа адыркит. Авирус раҧхьатәи афакт анаадырҧшыҵәҟьа, атәыла анапхгара аҧкрақәак шьақәдыргылеит, аха агәҽанҵара ҳарҭоит аҧкрақәа иаҳа ишыџьбарахо азы.

Атәыла анапхгара Аҧсни Цхинвалтәи арегиони ирықәынхо ауааҧсыра рзы иҟарҵаз ажәалагалақәа

Қырҭтәыла аиҳабыра, импыҵахалоу аҵакырадгьылқәа ирықәынхо ауааҧсыра акоронавирус ахкҿыц аҿагылараҿы ирыцхраарц ихиоуп. Аиҳабыра ахаҭарнакцәа рҳәамҭала, зыӡбахәы ҳәоу ауааҧсыра, егьырҭ атәылауаа реиҧшҵәҟьа, асервисқәа зегьы рхы иадырхәар рылшоит.

Аинаалареи атәылауаҩратә аиҟарареи азҵаарақәа рзы аҳәынҭқарратә министр иаппарат аҟынтә "Лаивпресс" ишазаарыцҳаз ала, Аҧсни Цхинвалтәи арегиони аглобалтә проблема аҿагылараҿы ацхыраара рыҭара аус иалахәып жәларбжьаратәи адонорцәеи апартниорцәеи.

Аминистр Қеҭеван Цихелашвили ишылҳәаз ала, атәыла аиҳабыра, дара рнапаҿы иҟоу акоммуникациатә каналқәа зегьы рхы иадырхәоит зыӡбахәы ҳәоу арегионқәа ирықәынхо ауааҧсыра авирус иазку аинформациа наӡа рымазарц, ари ашәарҭа ишаҿагылаша рдыруазарц азыҳәан: арҭ ауаа агәра ганы иҟазароуп Қырҭтәыла аҳәынҭқарра урҭ ишрыцхраауа, - илҳәеит аминистр, лара лажәақәа рыла, ари ахырхарҭала активла аусура иаҿуп.

Аҧыза-министр Гьаргь Гахариа ишааицҳаз ала, ампыҵахалара амшала, арҭ арегионқәа ирықәынхо ауааҧсыра, егьырҭ атәылауаа рхы иадырхәо асервисқәа рыла реиқәыршәара уадаҩуп, аха, атәыла аиҳабыра ари аганахьала ироуа алшарақәа зегьы рхы иадырхәоит.

Импыҵахалоу Аҧсни Қырҭтәыла егьи ахәҭеи еимыздо Егры ацҳа аркуп. Де-факто анапхгара ари аӡбара рыдыркылеит жәабран 27 рзы, акоронавирус аларҵәара аҽацәыхьчара амзызла. Аиҭаҵра азин рымоуп ЕгрыГес аусура зхьыҧшу ЕгрыГес аусзуҩцәақәак мацара.

Аҟәа акоронавирус ала ачмазаҩхара иазкны макьана аинформациа аладмырҵәацт.

Абжьааҧны Аҧсны ааҧынратәи аҧсшьарамшқәа мҩаҧысуан хәажәкыра 23 инаркны 29-нӡа. Аха, уажәы, акоронавирус апревенциа амзызла, аҧсшьарамшқәа заанаҵы ирыларҳәеит.

Хәажәкыра 18 рзы импыҵахалоу Аҧсны иаҭааит Агәабзиарахьчара адунеизегьтәи аиҿкаара аделегациа. Урҭ дрылан Қырҭтәылатәи аофис анапхгаҩы Сильвио Доменте. Де-факто адәныҟатәи аусқәа рминистр Даур Кове ишиҳәаз ала, аделегациа алахәылацәа Аҧсныҟа инаргеит агигиенатә хархәагақәеи, 600 литра еиҳаны арзҩыдаратә аӡшьари, 500 литра антибактериалтә асапыни.

Аҧсны еиҧшҵәҟьа, Цхинвалгьы акоронавирус ахкҿыц ала ачымазаҩхара иазкны иаармыцҳацт. Де-факто анапхгара рыӡбара ала, Цхинвали Қырҭтәыла егьи ахәҭеи еимыздо аиасырҭақәа зегьы аркуп. Ахалгори ахырхарҭала аиҭаҵра уаанӡагьы иҧкын, аха жәабран 27 рзы Переви-Қарзмантәи ахырхарҭагьы идыркит. Аофициалла ишаарыцҳаз ала, ари аӡбара рыдыркылеит акоронавирус аларҵәара ашәарҭа иадҳәаланы.

Ауаҧстә медиа адыррақәа инрықәыршәаны, де-факто анапхгара реилатәараҿы ишырыӡбаз ала, аҭагылазаашьа еицәахар, Цхинвали, Џьавеи, Ахалгории ахәышәтәырҭақәа рҿы ачымазацәа рхәышәтәразы абоқс-палата ҷыдақәа еиҿыркаауеит.

Қырҭтәыла егьи ахәҭа акоронавирус аларҵәара иаҿагылоуп

Хәажәкыра 19 рзы аларҵәара зауз аофициалтә информациа инақәыршәаны, Қырҭтәыла акоронавирус рымоуп 40ҩык ауааҧсыра. Аӡәы ачымазара далҵын, хәажәкыра 16 рзы ахәышәтәырҭа дҭыҵит. Акарантин аҿы иҟоуп 1344ҩык, астационар аҿы ишьҭоуп 216ҩык атәылауаа.

Қырҭтәыла акоронавирус раҧхьатәи афакт аарҧшын жәабран 26 рзы. Авирус иман 50 шықәса зхыҵуа Қырҭтәыла атәылауаҩ, иара жәабран 25 рзы Азербаиџьан далсны, Иранынтә Қырҭтәылаҟа дааит.

Иахьанаӡа иаарҧшыз афактқәа зегьы, Иран, Италиа, Франциа уҳәа, атәым тәылақәа рышҟа аныҟәара иадҳәалоуп.

Қырҭтәыла аӡәы иҟынтә ахҧатәи ахаҿы иахь авирус аиасра афактгьы иҟоуп. Атәыла Аҧыза-министр иҳәамҭала, акоронавирус иаҳа инарҭбааны аларҵәара аиур ауеит.

Аиҳабыра рыӡбара ала, дара акоронавирус аарҧшразы 20 нызқь атестқәа аархәеит.

Испаниа Қырҭтәыла иатәылауаҩыз ҧҳәыск дыҧсит. Аҧыза-министр ибжьагаҩ Иракли Чиқовани ишиҳәаз ала, 74 шықәса зхыҵуаз аҧҳәыс ачымазара лаҽқәа лыман.

Акоронавирус асимптомқәа

Акоронавирус ахкҿыц азы иҟазшьарбагоуп амцашоура ҳараки, аимҳәареи, аҧсыҧ лагаҩагара ауадаҩхареи. Аха, ари ачымазара асимптомқәа ацымзаргьы ауеит.

Аҳақьым шәидҵаала:

амцашоура шәымазар, шәеимҳәозар, шәҧынҵа еихачызар, аха, аҵыхәтәантәи аамҭазы авирус аларҵәара аганахьала ҷыдала ишәарҭоу атәылақәа рҿы шәыҟамзар, иара убас, ичмазаҩу ма зыӡбахәы ҳәоу атәылақәа рҟынтәи иааиз ауаҩы иҟны аимадара шәымамзар.

Атәымтәыла аҟынтә шәхынҳәызар, 37.5 ма еиҳаны амцашоура шәымазар, шәеимҳәозар, аҧсыҧ лагаҩагара шәцәыуадаҩзар, мамзаргьы, амцашоура шәымамзар, аха аҧсыҧ лагаҩагаратә органқәа аинфекциа егьырҭ адыргақәа шәымазар, мамзаргьы акоронавирус ала ичмазаҩу ауаҩы иҟны аимадара шәымазар, хымҧада ахәышәтәырҭа шәадҵаалароуп.

Акоронавирус ауаҩы иахь ишиасуа

Акоронавирус, бжеиҳарала, иасуеит ичмазаҩу ауаҩы иҟны аимадара ааигәа ала. Иасуеит аҳаир-кәарматә мҩала. Ашьҭымҭа алакьысра амшала акоронавирус ала ачымазаҩхара афактқәа аарҧшым.

Қырҭтәыла иҟоу Лугар илабораториа

Акоронавирус ахкҿыц иадҳәалоу аҭҵаарақәа мҩаҧысуеит Лугар ицентр аҿы, уи Америка атәылахьчара аминистрра афинанстә цхыраара ала, Қарҭтәи жәларбжьаратәи аҳаирбаҕәаза иазааигәаны иаартын 2011 шықәсазы.

Европа иреиҕьу атәылақәа рҿы адиагностиказы ҩымш аҭахызар, Қарҭ акоронавирус ахкҿыц азы атест ҟарҵоит сааҭқәак рыла. 2013 шықәса инаркны ари ацентр Ачымазарақәа рхылаҧшра амилаҭтә ҵентр иаҵанакуеит. 2018 шықәса инаркны, ацентр аҧара азоурышьҭуеит Қырҭтәыла аиҳабыра.

Лугар ицентр абиошәарҭадара 3-тәи аҩаӡара астандартқәа рыла еибыҭоуп, уаҟа ауаҩи аҧстәқәеи рзы ишәарҭоу ачымазарақәа рдиагностика мҩаҧыргоит.

Қарҭ инаваргыланы, акоронавирус азы атест амҩаҧгара уажәшьҭа иҟалоит Баҭыми Қәҭешьи иҟоу Лугар илабораториа аҟәшақәа рҿы.

Агәылацәа

Хәажәкыра 19 рзы иҟоу адыррақәа инрықәырҧшны, Иран акоронавирус ала ичмазаҩуп 17 361ҩык ауааҧсыра. Хәажәкыра 18 рзтәи адыррақәа рыла, иҧсхьеит 1135ҩык ауааҧсыра.

Аофициалтә информациа инақәыршәаны, Урыстәыла акоронавиурс рымоуп 147ҩык ауааҧсыра. Москва аҧсра фактк шьақәдырҕәҕәеит.

Иахьазы Шәамахьтәыла акоронавирус ала ичмазаҩуп 110ҩык ауааҧсыра.

Азербаиџьан 34ҩык, урҭ рҟынтәи аӡәы дыҧсхьеит.

Уажәазы Ҭырқәтәыла акоронавирус рымоуп 191ҩык ауааҧсыра.

Абжьагарақәа

Иахьазы, адунеи аҿы акоронавирус иаҿагылаша авакцина иҟам, аха, аҵарауаа аус ахьынӡаруа, ҳхы ҳахьчарцаз, Агәабзиарахьчара адунеизегьтәи аиҿкаара абжьагарақәа иазҧхьагәаҳҭароуп.

Уажәтәи аҭагылазаашьаҿы авирус аҿагыларазы иҟоу ахадаратә хархәага - агигиена ауп, лассы-лассы анапқәа рыӡәӡәареи алкоголь злоу агель ала ррыцқьареи. Аимҳәареи аимсареи ашьҭахьгьы. Уи аамҭазы, шәмышьхәылҵ, ма зныктәи аҿыхьшьы шәҿы иаҧырашәк, анеҩс, аҿыхьшьы иаразнакҵәҟьа ахҩа змоу аҟьамсарҭаҧсарҭа иҭашәыжьроуп.

Иара убас, иаҳхамшҭроуп шәҿы, шәыбла, ма шәқьышә шәнапала шәалакьысыр шыҟамло. Лассы-лассы шәнапқәа шәыӡәӡәала, афатә аҟаҵара шәалагаанӡагьы, афатә аныҟашәҵогьы, уи ашьҭахьгьы, акрынышәфогьы, ашьышьмаҭра шәанҭалогьы шәанҭыҵуагьы.

Афатәаалыҵ аҧхасҭа амоурц азыҳәан, акәац аӡа ма ирмазеиу ачыс шәалакьысаанӡа шәнапқәа шәыӡәӡәароуп.

Адәахьы аҧстәқәа рааигәара шәымнеироуп.
Print E-mail
Twitter
Ари aмaтериaлқәa
40 шықәса зхыҵуа Иракли Аҧсны дынхоит. Ҩышықәса ҵуеит
18:07 / 21.09.2021
40 шықәса зхыҵуа Иракли Аҧсны дынхоит. Ҩышықәса ҵуеит "метадон" аҧсахратә терапиа апрограмма ихы иаирхәоижьҭеи.
Амилаҭ-демократиатә институт NDI имҩаҧнагаз аҭҵаарақәа
инрықәыршәаны,
18:03 / 21.09.2021
Амилаҭ-демократиатә институт NDI имҩаҧнагаз аҭҵаарақәа инрықәыршәаны,
Ашәҟәы анашанатә мчы амоуп, уи иаҳнаҭо ахырҳагара уаҳа џьаргьы
иуоуам,
22:14 / 24.07.2021
Ашәҟәы анашанатә мчы амоуп, уи иаҳнаҭо ахырҳагара уаҳа џьаргьы иуоуам,
Аҧсны, Гал араион иаҵанакәа Пирвели Отобаиа ақыҭаҿ, ауҭраҵыҵындра
19:48 / 25.05.2021
Аҧсны, Гал араион иаҵанакәа Пирвели Отобаиа ақыҭаҿ, ауҭраҵыҵындра
Амультимедиa
Ашколахь асабрадала  - Ашколтә уадақәа рҿы аҵара еиҭалагеит  [афото]
Апандемиа амшала анахарала имҩаҧысуаз аҵаратә процесс иахьа,
Авакцинациа автобус аҿы [афото]
Жәыргьыҭтәи амуниципалитет ақыҭақәеи ақалақьқәеи ирықәынхо
„Ишәарҭамзаап“ – Авакцинациа ақыҭатә амбулаториаҿы  [афото]
74 шықәса зхыҵуа Заур Џьиқиа арасаҭраҿы дызҿыз аусқәа аамҭала