Ауaaжәлaррa
Аекспериментқәа бзиа избо хурчатәи [афото]
FaceBook Twitter
E-mail Print
Акыршықәса ҵуеит импыҵахалоу Аҧсны аҳәаа иаҧу жәыргьыҭтәи ақыҭа Хурча инхо Џамбул Ехваиа ақыҭаҿы анхамҩа еиҿкааны имоижьҭеи, идгьылҭыҧ аҿы, абиотехнологиа ихы иархәаны, еиуеиҧшым акультурақәа иааӡоит. Аргәыцтәқәеи ауҭраҭыхи арҧхарҭаҿгьы адәахьгьы еиҭаҳаны имоуп. Абио арасагьы имоуп, Қырҭтәыла лассы-лассы иуҧымло аҵиаақәагьы реихаҳара иҽазикит. Ари аус аҿгьы ақәҿиара имоуп. Иапониатәи акамелиеи афиниктә пальмеи еихеиҳаит.

Америкатә аҿиара агентра (USAID) аҧаратә цхыраара ала еиҿикааз, 240 аквадраттә метр аҵакыра змоу арҧхарҭатә нхамҩаҿы голландиатәи агәилқәа раарыхра игәы иҭан. Украинеи Польшеи рдәқьанқәа рҿы адекоративтә ҵиаақәа рзы аҿаҵа ҟаиҵахьан, аха, апандемиа амшала, ипланқәа зынаимгӡеит. Аха, уезгьы, игәы камыжькәа, ауҭраҭых иаҳа ихшыҩ азишьҭыр иҭахуп: „Уажәазы ақыҭаҿы ауаа афатәаалыҵ иаҳа ирҭахуп ҳәа сгәы иаанагоит“, - иҳәеит 70 шықәса зхыҵуа афермер.

Апандемиа амшала азарал ду имоуп, аха, уезгьы, ақыҭашҟа аҿар рыхынҳәра деигәырҕьоит. Џамбул Ехваиа инхамҩа шыбзиоу анырба, даргьы, иара иҿыҧшны, ақыҭанхамҩа рнапы аларкит.

Сынтәа Џамбул Ехваиа аҷыхи, апомидори, анашеи 300-300 аиҭаҳатәқәа илеиҵеит. Хара имгакәа, урҭ арҧхарҭантә адәахьыҟа ииаганы еиҭеиҳауеит. Ишиҳәо ала, ауҭраҭых аџьармыкьашҟа агара игәы иҭам, ауаа ахныҟәгара рцәыуадаҩхеит, убри аҟынтә, иҽаҩра зегьы, ихәыҷӡоу ахә ақәҵаны, уааҵәҟьа, ақыҭаҿы иҭиуеит:

„Ари аалыҵ ақыҭаҿы иаҳа ирҭахуп ҳәа сгәы иаанагоит, арааҵәҟьа исҭиуеит. Аӡә акы игәы иаанагар сҭахым, аха, аамҭа цәгьа ҳҭагылоуп, саргьы ауаа ирыхәаша ак ҟасҵар сҭахуп. Имаҷӡоу ахә ақәҵаны исҭиир сҭахуп, сқыҭауаа срыцхраар сҭахуп. Саргьы азарал смоуа, ак злаасхәаша аҧара хәыҷык схашәалатәы, убас исҭиуеит. Ақыҭауаа аиҭаҳатәқәа рҭахуп, аха, урҭ ирысҭаратәы усҟаҟ сымам. Уи даараӡа саргәамҵуеит. Исымазар бзиагәышьан, ишаны ирысымҭози, аха сахьымӡеит, иаалырҟьаны амҩақәа зегьы адыркит“, - иҳәеит Џамбул Ехваиа.

Афермер 2000 аквадраттә метр аҵакыраҿы италиатәи араса хкы - џьифон еиҭаҳаны имоуп, уааҵәҟьа ҳаамҭазтәи арҧссаратә система еиҿикааит. Ҵыҧх, ауаа рацәа араса аиҭаҳатә рҭахын, 300 раҟара аиҭаҳатәқәа иҭиит. Сынтәа уи еиҧш алшара иҟам.

Сынтәа аҵыҵындра иҭиуам. Аҩны ирызхаша 250 цыра мацароуп еиҭаҳаны имоу. Арҧхарҭаҿы ашәҭқәа рзы аҭыҧ аанижьит. Ишиҳәаз ала, абио ҵыҵындра аарыхразы аџьабаа ду аҭахуп, избанзар ашьақәыргыламҭа ҷыдақәа имам, аҵыҵындра иласны иҧхасҭахоит, иаразнакҵәҟьа иуҭиироуп. Ампыҵахалатә цәаҳәа иазааигәаны инхо афермер ишиҳәаз ала, ҧаса, Хурча - Набакеви агәаҭара-аушьҭратә пунк ианаартыз, аалыҵ зегьы мышқәак рыла иҭиуан.

Хурчеи галтәи ақыҭа набакевии аӡырҩаҧ әхыҷык ауп ирыбжьоуп, Набакевинтә ауаа иааны, аҵыҵындра аархәон. 2017 шықәсазы де-факто анапхгара аушьҭратә пунк адыркит. Убри ашьҭахь, афермер иаалыҵ зегьы жәыргьыҭтәи аџьармыкьашҟа инаганы иҭиуан.

Иара иқәра злаҟоу ала, аҵиақәа рааӡара иаҳа изыманшәалахар ҟалап ҳәа игәы иаанагоит, убри аҟынтә, ашәҭқәа рааӡара далагар иҭаҳуп, апандемиа ииасаанӡа дазыҧшуп. Аха, уаанӡа, аекспериментқәа мҩаҧигоит. Аҵиаақәа реихаҳара иазкны адырра бзиа иоухьеит.

„Лассы-лассы иуҧымло акамелиа ахкы „џьапан“ иласҵеит. Уи ашәҭ дуқәа амоуп. 8 - 10 см. иҟоуп. Ажьырныҳәазы ашәҭра иалагоит, акыраамҭа ишәҭуеит. Уи ааӡара уадаҩуп. Аиҭаҳатә баҭымтәи аботаникатә баҳчантә аазгеит. Убас ауп аиҭаҳатә ҿыцқәа шсоуз. Уажәгьы 500 цыра еихаҳаны исымоуп, уажәы излазбо ала, ибзианы иҿиауеит“, - иҳәеит Џамбул Ехваиа.

Аха, уи адагьы, Џамбул Ехваиа афиниктә пальмагьы еиҭеиҳан, аҽаҩрагьы иоухьеит. Афермер ари аексперимент иахылҵыз ақәҿиара ҷыдала деигәырҕьоит, гәызҭаҵагас изыҟалеит. Ишиҳәо ала, аҩны афиник иалхны ашәырҩеи, аџьеми, акомпоти ҟарҵеит. Агәылацәагьы иргәаҧхеит. Игәы ишаанаго ала, ақыҭанхамҩа ҕәҕәа ауп атәыла ақәҿиара азаазго, аҭаацәара цыҧхьаӡа, ирҭиратәы убри аҟара рзыҟамҵаргьы, аҩны ирызхаша аҽаҩра рымазароуп.
Print E-mail
Twitter
Ари aмaтериaлқәa
40 шықәса зхыҵуа Иракли Аҧсны дынхоит. Ҩышықәса ҵуеит
18:07 / 21.09.2021
40 шықәса зхыҵуа Иракли Аҧсны дынхоит. Ҩышықәса ҵуеит "метадон" аҧсахратә терапиа апрограмма ихы иаирхәоижьҭеи.
Амилаҭ-демократиатә институт NDI имҩаҧнагаз аҭҵаарақәа
инрықәыршәаны,
18:03 / 21.09.2021
Амилаҭ-демократиатә институт NDI имҩаҧнагаз аҭҵаарақәа инрықәыршәаны,
Ашәҟәы анашанатә мчы амоуп, уи иаҳнаҭо ахырҳагара уаҳа џьаргьы
иуоуам,
22:14 / 24.07.2021
Ашәҟәы анашанатә мчы амоуп, уи иаҳнаҭо ахырҳагара уаҳа џьаргьы иуоуам,
Аҧсны, Гал араион иаҵанакәа Пирвели Отобаиа ақыҭаҿ, ауҭраҵыҵындра
19:48 / 25.05.2021
Аҧсны, Гал араион иаҵанакәа Пирвели Отобаиа ақыҭаҿ, ауҭраҵыҵындра
Амультимедиa
Ашколахь асабрадала  - Ашколтә уадақәа рҿы аҵара еиҭалагеит  [афото]
Апандемиа амшала анахарала имҩаҧысуаз аҵаратә процесс иахьа,
Авакцинациа автобус аҿы [афото]
Жәыргьыҭтәи амуниципалитет ақыҭақәеи ақалақьқәеи ирықәынхо
„Ишәарҭамзаап“ – Авакцинациа ақыҭатә амбулаториаҿы  [афото]
74 шықәса зхыҵуа Заур Џьиқиа арасаҭраҿы дызҿыз аусқәа аамҭала