Ауaaжәлaррa
Акоронавирус аҽыхьчаратә вакцина иазкны иаҳзымдыруаз - авакцинациа иахылҵыр зылшо ауадаҩрақәеи урҭ рхылаҧшреи
Қырҭтәыла акоронавирус аҿагыларатә вакцинациа ианалага ахәбатәи амш азы, 27 шықәса зхыҵуаз амедиеҳәшьа дыҧсит. Абри арыцҳара иадҳәаланы, имаҷымкәа азҵаарақәа цәырҵит. Жәларбжьаратәи аҧышәа инақәыршәаны, авакцина алҵшәа бзиа амоуп. Уи ачымазара аҿкаара ашәарҭара еиҵнатәуеит, ауаа авирус ҿыркааргьы, рҭагылазаашьа уадаҩхом, аха, авакцина аваргылатә цәырҵрақәагьы амоуп, урҭ ҳзымдыруазар, алҵшәа цәгьа ҳаур ауеит. Авакцина иазкны иаҳзымдыруазеи?

Акоронавирус аҽыхьчаратә раҧхьатәи алаҵа Жәыргьыҭ иҟаҵан. Уажәазы арегион аҿы 118ҩык амедицинатә усзуҩцәа авакцина рзыҟарҵахьеит.

Хәажәкыра 18 рзы, Ахалцихе, акоронавирус аҽыхьчаратә лаҵа ззыҟарҵаз амедиеҳәшьа Меги Бақраӡе лҭагылазаашьа цәгьахеит. Лара Қарҭ, Ауниверситеттә клиникашҟа дииаргеит, аха, дырзеиқәдмырхеит. Ачымазарақәа рхылаҧшра амилаҭтә центр адиректор Амиран Гамҟрелиӡе ишиҳәаз ала, лара анафилактикатә реакциа лоузар ҟалап. Аҩнуҵҟатәи аусқәа рминистрра абри афакт иадҳәаланы аусеилыргара мҩаҧнагоит ашьауҕатә закәанеидкыла 116-тәи ахәҭаҷ ала, агәҽанымзаара амшала ауаҩы иҧсразы.

Ахалцихетәи амедиеҳәшьа даныҧсы ашьҭахь, авакцицнациа апроцесс аанкылан.

Алаҵа ҟарҵаанӡа ауаҩҧсы игәабзиара аҭагылазаашьа гәарҭоу гәарымҭоу

Ишеилкаахаз ала, алаҵа ҟарҵаанӡа, ауаҩҧсы ихьақәа гәарҭоит, амедицинатә усбарҭаҿы ауаҩы алаҵа изыҟарҵаанӡа, азҵаарақәа ирҭоит, чек-лист хаирҭәаауеит, уаҟа, игәабзиара аҭоурых иадҳәалоу азҵаарақәа аҭак риҭароуп. Ауаҩҧсы алаҵа ҟаиҵаанӡа, хымҧада абри азҵарақәа зегьы аҭак риҭароуп.

"Алаҵа ҟазҵараны иҟоу ауаҩҧсы хымҧада ҳиазҵаауеит, дычмазаҩума, хьаак имоума? Иарбанзаалак хәшәык ма вакцинак азы аллергиа имоума, иара убас, зцәазтәымкәа иҟоу аҳәса, асаби агәыҧҳәы иҿазҵо аҳәса ирызкны азҵаарақәа иҟоуп. Хәшәқәак ижәозар еилаҳкаауеит. Ааи, мамзаргьы мап ҳәа аҭак ҟаҵатәуп. Ауаҩы аллергиа имазар, уи азгьы инарҭбаау асхема иҟоуп", - иҳәеит азҵаатәы аиқәыршәара иалахәыз аҳақьым-аллерголог Биӡина Кулумбегов. Аха, Меги Бақраӡе лыҧсра ашьҭахь лабҿаба иубарҭахеит абри аҩыза агәаҭара шазымхо, аминистрра аӡбара ала, азҵаатәы иҵегьы азҵаарақәа ацлеит.

Акоронавирус аҽыхьчаратә лаҵа аваргылатә цәырҵрақәас иамоу

Ачымазарақәа рхылаҧшра амилаҭтә центр аинформациа ала, аковид-19 аҽыхьчаратә вакцина аваргылатә цәырҵрақәа амоуп, урҭ рҟынтә зегьы раасҭа аларҵәара рымоуп: амышьхәылҵ аҿы ахьаа, аҟаҧшьхара, ачра, амцашоура, агәыхынҳәра. Аха, абри зегьы авакцинациа анеҩс мышқәак раамышьҭахь ицәырҵуеит.

Аҳақьым Биӡина Кулумбегов иҳәамҭала, Фаизер авакцина ҟазҵаз 1 миллионҩык рҟынтә 5ҩык анафилактикатә реакциа роуит. Агрипп аҽыхьчаратә вакциа аасҭа хәынтә еиҳаны. Модерна аасҭа - 2, 5-нтә еиҳаны. Астразенека 5 миллион адозақәа рҟынтә 41 раан анафилаксиа аарҧшын, ҽакала иаҳҳәозар, 1 миллионҩык рҟынтә 8 ҩызаҵәык роуп анафилакциа зыхьыз. Аха, авакцина иахылҵыз анафилаксиа амшала, Қырҭтәыла ада, џьаргьы аӡәгьы дымҧсӡацт.

Европеи Британиа Дуи акоронавирус аҽыхьчаратә лаҵа ашьҭахь ҧыҭҩык аныҧсы, "Астразенека" авакцина атромбоз ахылҵуеит ҳәа агәҩара рызцәырҵит. Аилахәыра "Астразенека" аинформациа ала, Европеи Британиа Дуи авакцина ззыҟарҵаз 17 миллионҩык иреиҳаны ауааҧсыра рҟынтәи 37ҩык атромбоз амшала иҧсит ҳәа адырра роуит. Убри ашьҭахь, 13 иреиҳаны европатәи атәылақәа рҿы "Астразенека" ахархәара иаҟәыҵит, аха, Европатәи ахәшәқәа рагентра ала имҩаҧгаз аҭҵаарақәа рыла ишьақәыргылаз ала, зыӡбахәы ҳәоу ауааҧсыра рыҧсра авакцинациа иадҳәалам, агентра ахаҭарнакцәа авакцина шәарҭам ҳәа ирыҧхьаӡоит. Убри анеҩс, Евроеидгыла атәылақәа реиҳара "Астразенека" ахархәара еиҭалагеит.

Анафилаксиа закәызеи, уи ахылаҧшра ҟалома

"Аваргылатә цәырҵрақәа рыгәҭа анафилактикатә реакциа – зегьы реиҳа иуадаҩу аллергиатә реакциа ауп, аха, авакцинациа ахьымҩаҧысуа аҭыҧаҿы амедицинатә цхыраара алшара иҟазар, ауаҩҧсы дыҧсӡом. Ауаҩҧсы иаамҭаны ацхырараа иоур, анафилактикатә реакциа ахәышәтәра уадаҩым, авакцинациа аамышьҭахь ауаҩы иҧсра факткгьы иҟам. Анафилаксиа – уаанӡа иаадыруаз авакцинақәа зегьы ирхылҵыр ауеит, әҳарада, акоронавирус аҽыхьчаратә лаҵа аҟаҵара аан ашәарҭара иаҳа идууп, аха, аҭагылазаашьа ахылаҧшра ҟалоит. Авакцинациа ахьымҩаҧысуа ҳгоспиталь аҿы хырҧашьа змам амедицинатә цхыраара аҟынтә әгыҧҩык аҳақьымцәа ҳамоуп, ауаҩҧсы анафилактикатә реакциа иоур, зыҧшра ҟамҵакәа ицхраарц азыҳәан. Абри ареакциа ахылаҧшразы адырра ҷыдеи атехнологиа ҷыдеи аҭахым", - илҳәеит Америка аус зуа ақыҭуа ҳақьым Нана Гегеҷкори.

Анафилаксиа аан, ауаҩҧсы, раҧхьа иргыланы, иаразнакҵәҟьа адреналин (епинефрин) изыҟаҵатәуп. 27 шықәса зхыҵуаз амедиеҳәшьа иаамҭаны иахәҭаз ацхыраара лырҭоу илырымҭоу еилкаахоит аусеилыргара ашьҭахь.