ინფექციისგან დაავადებული 89 პირია, მათ შორის 39 ბავშვი. განუცხადა „ლაივპრესს“ ზუგდიდის მუნიციპალიტეტის საზოგადოებრივი ჯანდაცვის ცენტრის ხელმძღვანელმა ნანა ოდიშარიამ. ამ ეტაპზე სტაციონალურ მკურნალობას ხუთი ადამიანი გადის, რომელთაგან სამი ბავშვია. ნანა ოდიშარიას თქმით, მისი სამსახურის და იძულებით გადაადგილებულ პირთა პოლიკლინიკის ექიმები იმყოფებოდნენ ადგილზე - თაბუკაშვილზე მდებარე დევნილთა ჩასახლებაში 204 ოჯახში.

„ამ ორი დღის განმავლობაში ამბულატორიული მომსახურეობისთვის ამ ხუთი პირის გარდა 19-მა მიმართა სხვადასხვა სამედიცინო დაწესებულებას. მათ მიიღეს სხვადასხვა მომსახურეობა. ამას გარდა 64 ავადმყოფი ექიმების მიერ იქნა ადგილებზე კონსულტირებული. მათ ძირითადად ჯანმრთელობის მსუბუქი დაზიანება აქვთ“, - გვითხრა ნანა ოდიშარიამ.

მისი თქმით, აღებულია ლაბორატორიული სინჯები, მათ შორის სურსათის უვნებლობის სამსახურმა წყლის, დაავადებათა კონტროლის ეროვნულმა ცენტრმა კი დაავადებულებისგან აიღო ბაქტერეოლოგიური და ვირუსოლოგიური კვლევებისთვის სინჯები. პასუხები სავარაუდოდ ორშაბათ-სამშაბათს გახდება ცნობილი.

„დღეს ვფიქრობთ, რომ ეს არის წყლისმიერი ეპიდ-აფეთქება“, - განმარტა ნანა ოდიშარიამ.

დევნილთა ჩასახლებაში მცხოვრებთა მოწამვლის შემთხვევები ორი დღის წინ დაფიქსირდა. ყველა მათგანს ერთი და იგივე სიმპტომები აღენიშნება - სიცხე, დიარეა, გულის რევის შეგრძნება. მოსახლეობა ვარაუდობს, რომ მიზეზი სასმელი წყალია.