ზუგდიდის მუნიციპალიტეტის სოფელ რუხში, აფხაზეთ -სამეგრელოს ადმინისტრაციული საზღვრის სიახლოვეს, კოლხური ბზის სანერგე მეურნეობის მშენებლობა მაისში დასრულდება, რომელიც ამიერკავკასიაში პირველი იქნება.

სანერგე მეურნეობას აფხაზეთის ავტონომიური რესპუბლიკის მთავრობის მხარდაჭერით არასამთავრობო ორგანიზაცია „აგორა“ აშენებს.

აფხაზეთის სოფლის მეურნეობის, ბუნებრივი რესურსების და გარემოს დაცვის დეპარტამენტის თავმჯდომარე ვალერი ბასარიამ „ლაივპრესს“ განუცხადა, რომ საზღვრისპირა სოფელი რუხი აფხაზეთთან სიახლოვის მოტივით შეირჩა, რათა ამ რეგიონმაც შეძლოს მეურნეობით სარგებლობა.

„კოლხური ბზა გადაშენების პირასაა, ვიფიქრეთ, რომ რუხში გამოყვანილი კოლხური ბზის ნერგები მნიშვნელოვნად შეამცირებს ბზის გარშემო არსებულ ეკოლოგიურად მძიმე მდგომარეობას. ამ მხრივ, ერთნაირი ვითარებაა სამეგრელოში და აფხაზეთშიც“, - ამბობს ბასარია.

არასამთავრობო ორგანიზაცია „აგორას“ აღმასრულებელი დირექტორის თენგიზ სვანიძის განცხადებით, რუხში გამოყვანილი კოლხური ბზის ნერგების ნაწილი აფხაზურ მხარეს უსასყიდლოდ გადაეცემა.

„დაავადებამ არ იცის საზღვარი, არც პირობითი და არც გამყოფი, ყველამ გაითავისა, რომ ბზა გადასარჩენია. ამ სათბურში მოხვდება ჯანმრთელი, საქართველოს სხვადასხვა რეგიონებიდან აღებული ბზის კალმები, ის გაიზრდება, გაძლიერდება და გადაირგვება ნახევარი აფხაზეთში, სადაც უკვე გვყავს პარტნიორი შერჩეული. დანარჩენი კი ჩვენს მხარეს დარჩება“, - განაცხადა სვანიძემ.

მისივე თქმით, რუხის სანერგე მეურნეობაში მოყვანილი 100 ათასი ნერგი იქნება ამიერკავკასიის სარეზერვო ფონდი, რომელიც უძველეს მცენარეს გადაშენებისგან დაიცავს.

კოლხური ბზის სანერგე სოფელ რუხში 480 კვადრატული მეტრის ფართობზე მოეწყობა. ამ ეტაპზე მიმდინარეობს სასათბურე კონსტრუქციების მოწყობა. სანერგე მეურნეობა სექტემბრიდან ამუშავდება.