ზუგდიდის საკრებულოს ფრაქცია „ნაციონალური მოძრაობის“ წევრის ანა წითლიძის განცხადებით, ზუგდიდის თვითმმართველობის თანამდებობის პირები ტენდერებში, კორუფციული გარიგების საფუძველზე თანხებს ითვისებენ. ქალაქის საკრებულოს წევრმა შესაბამისი განცხადება „ერთიანი ნაციონალური მოძრაობის“ ზუგდიდის ოფისში გააკეთა.

დეპუტატის განცხადებით, ქალაქში სხვადასხვა სამშენებლო სამუშაოებზე გამოცხადებულ ტენდერებში გამარჯვებული ძირითადად ერთი და იგივე კომპანიები ხდებიან, რომელთა ხელმძღვანელები ქალაქის მერის, მისი მოადგილის, ვიცე-მერის, ქალაქის საკრებულოს თავმჯდომარის მეგობრები და ნათესავები არიან. მისი თქმით, "კორუფციული გარიგების" შესახებ ინფორმირებულია გუბერნატორი, ლევან შონია, თუმცა ფაქტზე რეაგირებას არ ახდენს.

ანა წითლიძემ ბრიფინგზე, რომელსაც მედიასთან ერთად არასამთავრობო ორგანიზაციის წარმომადგენლებიც ესწრებოდნენ წარმოადგინა „თვითმმართველი ქალაქ ზუგდიდის მუნიციპალიტეტის მერიის და საკრებულოს მიერ გამოცხადებული ტენდერების კორუფციული სქემა“:

„ინდ. მეწარმე ელდარ ფიფია (მეტსახელად არწივა)- ზუგდიდის საკრებულოს წევრის, განათლების, კულტურის, სპორტის და ახალგაზრდულ საქმეთა კომისიის თავმჯდომარის ნათია ფიფიას მამა. მისი კომპანიონი სოსო თოდუა - საკრებულოს თავმჯდომარის მოადგილის გიორგი თოდუას მამა. ინდ. მეწარმე სოსო გოგოხია - ელდარ ფიფიას პარტნიორი. ზუგდიდის მუნიციპალიტეტის საკრებულოს წევრი.

შპს ზუგდიდმშენსერვისი,- ზუგდიდის მერის მოადგილის ( ზუგდიდის მერი ირაკლი გოგოხია მისი მეჯვარეა) კობა ჯიქიას სიმამარი თემურ ჯანაშიასია. მთავარი ინჟინერი არის ბესიკ თოდუა - არქიტექტურის სამსახურის უფროსის ეკატერინე თოდუას მამა.

შპს აკაენერჯი - კახაბერ აზიკური (კახა კალაძესთან დაკავშირებული კომპანიაა) ვიცე მერი გულორდავა ლობირებს ჩამოყვანას. შპს ჯორჯიან სტოუნი (ბათუმი, ქობულეთი) ამ კომპანიის წარმომადგენელი ზუგდიდიში არის ირაკლი გოგოხიას ძმა პაატა გოგოხია, შპს ლეგი მისი პარტნიორი ორგანიზაციაა.

შპს გილანი XXI - ავთანდილ წირღვავა, ლექსო წირღვავა. ზუგდიდის ვიცე-მერის გია გულორდავას ლობირების ქვეშ. (გარდა ამისა ერთ პირთან მოლაპარკებით ამ კომპანიას მიეცა ყინულის სახლის 850 ათასი და სპორტის სასახლის გადახურვის 250 ათასი). შპს გზამშენი და ქვეკონტრაქტორი ამი 2014 - ე.წ. ქვაფენილების საქმე - ზუგდიდის ვიცე მერის გია გულორდავას ლობირებით. შპს რეზი 10 არჩილ ხუბუნია - ვიცე მერი გულორდავას ლობირებით. შპს კავკასენერგო - ვიცე მერი გულორდავას ჩამოყვას“, - ნათქვამია „კორუფციულ სქემაში“, რომელიც დღეს ჟურნალისტებს ანა წითლიძემ გააცნო.

„ქალაქ ზუგდიდის მუნიციპალიტეტის საკრებულო ამ აბსურდულ ბრალდებაზე კომენტარს არ აკეთებს ერთი მარტივი მიზეზის გამო. საკრებულოს არ გააჩნია სამუშაოების გადანაწილების არანაირი ტექნიკური საშუალება. შესაბამისად მიგვაჩნია, რომ ეს არის წინასაარჩევნო სპეკულაციებთან დაკავშირებული განცხადება”, - აცხადებენ საკრებულოს პრესსამსახურში.

სამეგრელო-ზემო სვანეთის გუბერნატორის ადმინისტრაციაში კი ჟურნალისტებს განუცხადეს, რომ ანა წითლიძის მიერ ბრიფინგზე დასახელებული პირებს არ იცნობენ კომენტარი კი არ გაკეთდება რადგან ბრალდებები „აბსურდულია“. იგივე მიზეზით განცხადება არც მერიაში გაუკეთებიათ.