გალის რაიონის დე ფაქტო ადმინისტრაციის ხელმძღვანელის თემურ ნადარაიას ინფორმაციით, საოკუპაციო საზღვართან არსებული ოთხი გამშვები პუნქტიდან ყოველდღიურად დაახლოებით 1500 ადამიანი გადადის სამეგრელოს რეგიონში. მისივე თქმით, ამდენივე ადამიანი ბრუნდება უკან.

„თითქმის ერთიდაიგივე ადამიანები არიან. ისინი მიდიან ბაზარში, ნათესავების სანახავად, სამედიცინო დაწესებულებეში. მათი უმრავლესობა 95% გალის რაიონის მცხოვრებია“, - განაცხადა თემურ ნადარაიამ.

დე ფაქტო ადმინისტრაციის ხელმძღვანელი ამბობს, რომ მას შემდეგ რაც, რუსეთის სამხედროებმა საოკუპაციო საზღვარზე კონტროლი გააძლიერეს, მოქალაქეების რაოდენობამ ე.წ. გამშვებ პუნქტებთან იმატა.

აფხაზეთ-სამეგრელოს ადმინისტრაციული საზღვრის გასწვრივ რუსეთის სამხედროების რაოდენობა რომ გაიზარდა, ამის შესახებ „ლაივპრესს“ გალში მცხოვრებმა რესპონდენტმა ტელეფონით აცნობა. მისი ინფორმაციით, რუსეთის სამხედროები აკონტროლებენ საოკუპაციო ზოლის იმ ნაწილსაც, სადაც მანამდე არ იმყოფებოდნენ. ამასთან, რესპონდენტის თქმით, სამხედროები ადგილობრივ მოსახლეობასთან საუბარში აცხადებენ, რომ გალი მალე სამხედრო ქალაქი გახდება.

„დგანან ახალი გზა რომ გააკეთეს ოტობაიისკენ იქაც. საუბეთებს ამოწმებენ, მეტი არაფერი. ოფიციალური საგუშაგოს მსგავსი კი არ აქვთ, ისე დგანან. გალზე ამბობენ „ვაენნი გარადოკი“ იქნებაო. მოსახლეობას ამაზე არ აქვს ცუდი რეაქცია. პირიქით, არც ყაჩაღობაა რაც ესენი შემოვიდნენ. ადრე, ღამე ქუჩაში გამოსვლის გვეშინოდა. ესენი არავის არ ერჩიან. უბრალოდ დგანან“, - უთხრა „ლაივპრესს“ რესპონდენტმა და აღნიშნა, რომ ჯერჯერობით გალის რაიონში სამხედრო ტექნიკის მატება არ შეუნიშნავთ.

ნადარაიას ცნობით, თუ 2014 წელს ადმინისტრაციული საზღვარი 1 მილიონ 112 ადამიანმა გადალახა, მომდევნო წელს, ეს ციფრი მილიონ 127 ათასამდე გაიზარდა, ხოლო მიმდინარე წლის ათი თვის განმავლობაში უკვე დაფიქსირდა 1 მილიონ 83 ადამიანი.