ახალგაზრდა იურისტთა ასოციაციის მიერ ჩატარებულისა კვლევის მიხედვით გაირკვა, რომ პოლიტიური პარტიების პროპორციულ სიებში, ქალები ძირითადად ბოლოს არიან წარმოდგენილები, რაც მათ შანსს არ უტოვებს მოხვდნენ გამარჯვებულთა რიგებში. კიდევ უფრო მცირე რაოდენობით არიან ქალი მაჟორიტარები.

კვლევაში ნათქვამია, რომ ხშირ შემთხვევაში, პოლიტიკური პარტიების მხრიდან ქალთა პოლიტიკაში მონაწილეობა აღიქმება, როგორც მათი დასაქმება უბნის, ზონის კოორდინატორებად, ან საარჩევნო კომისიებში.

„კვლევის შედეგად გამოიკვეთა ძალიან საინტერესო რამ. როცა პარტიაში პრობლემებია, მას ტოვებენ მამაკაცები. ქალები კი რჩებიან იმ პარტიების ერთგულნი, რომელთაც ისინი თავიდან წარადგინეს. ასევე, ძალიან საინტერესოა, რომ წინა მოწვევის პარლამენტში 16 კაცს არ გამოუყენებია პარლამენტის ტრიბუნა, ასეთი ფაქტი ქალ დეპუტატებს შორის არ დაფიქსირებულა. არ ყოფილა ქალი დეპუტატი, რომელსაც თუნდაც ერთხელ მაინც არ გამოუყენებია პარლამენტის ტრიბუნა“, -განაცხადა საიას ზუგდიდის ოფისის ხელმძღვანელმა ჯემალ ჭკადუამ.

მისოვე თქმით, პროექტის ფარგლებში გაანალიზდა საქართველოს კანონმდებლობა. განხილულ იქნა საერთაშორისო სტანდარტები, ვალდებულებები პოლიტიკურ საარჩევნო პროცესებში ქალთა ჩართულობასთან დაკავშირებით, და გაიცა რეკომენდაციები ამ მიმართულებით.

ორგანიზაცია საპარლამენტი არჩევნების გენდერულ ანალიზს 2018 წლამდე განახორციელებს.

ცნობისათვის, საქართველოს პარლამენტში მხოლოდ 24 ქალი დეპუტატია. ოფიციალური სტატისტიკით, 69 გამგებლიდან მხოლოდ ორი ქალია. არც ერთი მერი და არც ერთი გუბერნატორი არ არის ქალი.