ზუგდიდის რაიონული საავადმყოფოს შენობაში მცხოვრები დევნილები უკვე მეორე დღეა შიმშილობენ. ისინი სპეციალური კომისიის მიერ მინიჭებული ქულების ხელახლა შესწავლას მოითხოვენ. აფხაზეთიდან იძულებით გადაადგილებული პირები ამბობენ, რომ შიმშილობის დაწყების კიდევ ერთი მიზეზი, დევნილთა ნაწილისთვის ფულადი დახმარების შესაძლო შეწყვეტა გახდა.

„ჩვენთან გაუსაძლისი მდგომარეობაა, შენობა ავარიულია, სასმელი წყალი უვარგისია, კდელები გაბზარულია, იატაკი ჩავარდნილია, ერთ დღეს ბავშვი ჩავარდა. დაუცველები ვართ, ვითხოვთ პრემიერ-მინისტრმა მოგვაქციოს ყურადღება“, - ამბობს აფხაზეთიდან დევნილი მზია ყოლბაია.

იმ შემთხვევაში თუ მათი მოთხოვნა არ დაკმაყოფილდება, ამბობენ, რომ შიმშილობის უფრო მძიმე ფორმას - „მშრალ“ შიმშილობას მიმართავენ.

დევნილთა შიმშილობის აქციის შესახებ ცნობილია ლტოლვილთა სამინისტროს აჭარისა და სამეგრელო-ზემო სვანეთის ტერიტორიული ორგანოსთვის. მისმა უფროსმა მანუჩარ ჩილაჩავამ „ლაივპრესს“ განუცხადა, რომ სამინისტროს წარმომადგენლებთან ერთად შეხვდნენ დევნილებს, სადაც გადაწყდა, რომ მათ ამჟამინდელ საცხოვრებელ კორპუსს სახელმწიფო ექსპერტიზა ჩაუტარდება.

რაც შეეხება დევნილების ნაწილისთვის 45-ლარიანი დახმარების შესაძლო გაუქმებას, სამინისტრო შემწეობის რეფორმაზე არასამთავრობო ორგანიზაციებთან ერთად ჯერ კიდევ მუშაობს.