სამეგრელო-აფხაზეთის ადმინისტრაციულ საზღვარზე ხურჩა-ნაბაკევის ე.წ. გამშვები პუნქტის დახურვა ერთი თვით გადაიდო, - შესაბამის ინფორმაციას გამოცემა „კავკასკი უზელი“ ნაბაკევის დე ფაქტო ადმინისტრაციის უფროსზე ნანი ქარდავაზე დაყრდნობით ავრცელებს.

მისი მტკიცებით, ე.წ. გადასასვლელის გაქუმების ზუსტი თარიღი ჯერ დადგენილი არ არის. ამასთან ნანი ქარდავას სიტყვებითვე, შექმნილია საინიციატივო ჯგუფი, რომელიც გეგმავს მიმართოს დე ფაქტო პრეზიდენტ რაულ ხაჯიმბას არ დაიხუროს ადმინისტრაციულ საზღვარზე საკონტროლო გამშვები პუნქტები.

„თუ პუნქტი დეაიხურა ნაბაკევის მოსახლეობას გადაადგილებასთან დაკავშირებით პრობლემები შეექმნება. პირველ რიგში სოფლის მცხოვრებთ მოუწეევთ საქართველოში გამგზავრება ენგურის ხიდის გავლით. ეს კი უკვე 30 კილომეტრის გავლას ნიშნავს. წარმოიდგინეთ ეს დამატებით რამდენ დროს მოითხოვს მგზავრებისგან. ავტობუსითაც კი ბევრი დროა - ძალიან ბევრი. ეს იქნება პრობლემა ხურჩაში (ზუგდიდის მუნიციპალიტეტი) მცხოვრები ბავშვებისთვის, რომლებიც ჩვენს სკოლაში სწავლობენ (სკოლის სიახლოვის მიზეზით)“, - ამბობს ნანი ქარდავა.

მისი განცხადებით, ნაბაკევის სკოლაში ზუგდიდის სოფელ ხურჩიდან ოთხი მოსწავლე დადის, საიდანაც სამი მეთერთმეტე კლასის მოსწავლეა, ერთი კი მეცხრე კლასის. პუნქტის დახურვის შემთხვევაში მათ სხვა სასწავლებელში გადასვლა მოუწევთ. ნანი ქარდავას განცხადებით, მოსწავლეებს ტერიტორიულად სწორედ ნაბაკევის სკოლა აწყობთ, რადგან ადგილზე უახლოეს სასწავლებლამდე 8 კოლომეტრია.

„თქვენ წარმოიდგინეთ, რომ ეს მოსწავლეები ჯერ ენგურის ხიდამდე უნდა მივიდნენ, გადმოკვეთონ საზღვარი და მერე მოვიდნენ ნაბაკევში. ამასთან საზღვარზე დილიდან დიდი რიგია. ამაში დიდი დრო დაიხარჯება. ახლა კი ქართულ სკოლაში მათ ვერ მიიღებენ. ისინი აქ დამამთავრებელ კლასებში სწავლობენ, იქ სხვა პროგრამაა“, - განმარტა მან.

მისი ინფორმაციით, დღეის მონაცემებით სოფელ ნაბაკევში დაახლოებით 1 400 ადამიანი (370 კომლი) ცხოვრობს, რომელთა დიდი ნაწილის საქმიანობა არა ბიზნესი, არამედ სოფლის მეურნეობაა.

„დაბალი ზონის მოსახლეობა დაკავებულია მხოლოდ სოფლის მეურნეობით და არსად არაფერი არ გადააქვთ. ბიზნესით დაკავებული არიან მხოლოდ სოხუმში და გალში მცხოვრები მეწარმეები. მათ საქონელი მოქავთ ზუგდიდიდან. ძირითადად ხილი, ბოსტნეული და სხვადასხვა საყოფაცხოვრებო ნივთები“, - აღნიშნა ნანი ქარდავამ.

საინიციატივო ჯგუიფის ერთ-ერთი წევრის ზაირა გაბელიას განცხადებით კი, ნაბაკევის საკონტროლო გამშვები პუნქტი მათთვის „ჰაერივით მნიშვნელოვანია“ და დახურვის შემთხვევაში სოფლის დატოვება მოუწევთ. მისი განმარტებით, ნაბაკეველები ე.წ. გადასასვლელის დახურვას არ დაუშვებენ და ამისთვის ბოლომდე იბრძოლებენ.

„კავკასკი უზელი“ ადმინისტრაციის უფროსისა და საინიციატივო ჯგუფის წევრის პარალელურად ნაბაკეველების მოსაზრებასაც აქვეყნებს, მათი ვინაობის დაუსახელებლად.

გამოცემის ინფორმაციით, სოფლის მცხოვრებნი მზად არიან დე ფაქტო მთავრობის მხრიდან დათმობაზე წასვლის შემთხვევაში გამშვები პუნქტი ჩანთების გარეშე გაიარონ, რადგან ნათესავების მონახულება მაინც შეძლონ.
„მე ხურჩაში ნათესავები მყავს. ჩვენ გვინდა, რომ ეს საგუშაგო არ დახურონ, იმიტომ რომ ის ყველაზე კომფორტული და მოსახერხებელი დაბალ ზონაში. ჩვეთვის გადაადგილება ასე უფრო მარტივია - ერთი, ორი და მორჩა ხურჩაში ვართ. თუ ენგურის ხიდამდე ვიმგზავრებთ ბევრი დრო დაგვჭირდება“, - ამბობს ნაბაკეველი.

მეორე რესპონდენტი გამოცემასთან საუბრისას ყურადღებას ამახვილებს სამედიცინო საჭიროებებზე და ამ მხრივ ხურჩა-ნაბაკევის პუნქტის მნიშვნელობაზე. სოფლის მკვიდრის თქმით, აღნიშნულ გადასასვლელს იყენებენ აქტიურად ავადმყოფები, რომლების მედიკამენტებსა და სამედიცინო მომსახურებაზე ზუგდიდში მოდიან.

„ასე უფრო იაფი გვიჯდება. წამალი, რომელშიც საქართველოში 100 რუბლს ვიხდით, აფხაზეთში 300 ღირს“, - განმარტავს რესპონდენტი.

ადმინისტრაციულ საზღვარზე გამშვები პუნქტების დახურვასთან დაკავშირებით „კავკასკი უზელი“ გალის დე ფაქტო ადმინისტრაციის უფროს თემურ ნადარაიას გაესაუბრა. მისი სიტყვებით, ამ გადაწყვეტილებით რაულ ხაჯიმბას საარჩევნო დაპირება სრულდება. ამასთან ნადარაია დასძენს, რომ საუბარი არ ყოფილა ე.წ. საზღვრის სრულად ჩაკეტვაზე.

„პუნქტების დახურვა, ეს არის აფხაზეთში მცხოვრები მოქალაქეების დიდი ნაწილის მოთხოვნა. ისინი ამბობენ, რატომ გვაქვს მეგობარ რუსეთთან მხოლოდ ერთი გამშვები პუნქტი, ხოლო ქვეყანასთან, რომელიც ჩვენთან არის საომარი მდგომარეობის პირობებში, გვაქვს ექვსი პოუნქტი?! - ჩვენ არ ვსაუბრობთ საზღვრის სრულ ჩაკეტვაზე“, - განმარტა ნადარაიამ.

მისივე სიტყვებით, იცოდნენ რა, რომ ეს გადაწყვეტილება არ იქნებოდა მოსახერხებელი გალის დაბალი ზონის მცხოვრებლებისთვის, დაიწყეს მომზადება - შეკეთდა საავტომობილო გზა, რისთვისაც რუსეთიდან მიღებული 153 მილიონი რუბლი დაიხარჯა; დაიგო 32 კილომეტრიანი გზის საფარი, დაინიშნა ავტობუსი, რომელიც დღეში ორჯერ მოძრაობს დაბალი ზონიდან ენგურის ხიდის მიმართულებით და პირიქით.
თემურ ნადარაიას სიტყვებით, ტრანსპორტი ჯერ სრული დატვირთვით ვერ მუშაობს, რადგან დაბალ ზონაში ჯერ კიდევ ფუნქციონირებს ე.წ. საკონტროლო გამშვები პუნქტები.

აფხაზეთის დე ფაქტო ხელისუფლება სამეგრელო-აფხაზეთის ადმინისტრაციულ საზღვარზე კიდევ ორი გამშვები პუნქტის - ხურჩა ნაბაკევისა და ორსანტია-ოტობაიის დახურვას გეგმავს. ე.წ. გადასასვლელების შემცირების პროცესი ჯერ კიდევ 2016 წლის აპრილში დაიწყო, როცა ერთი გამშვები პუნქტი ზუგდიდის სოფელ შამგონას მოსაზღვრე თაგილონისა და მეორე წალენჯიხის სოფელ ფახულანის მოსაზღვრე ლეკუხონაში გაუქმდა. ფე ფაქტო მთავრობა საბოლოოდ მხოლოდ ენგურის ხიდზე გეგმავს გამშვები პუნქტის დატოვებას.

გალელები დე ფაქტო მთავრობას მოუწოდებენ არ დახუროს ქვედა ზონის ე.წ. გადასასვლელები. ამ მოთხოვნით 25 იანვარს ოკუპირებულ რეგიონში ორი საპროტესტო აქცია გამართა. ერთი ენგურის ხიდთან, სადაც 200-მდე მოქალაქე შეიკრიბა და პროტესტის ნიშნად გზა გადაკეტა, მეორე კი შედარებით მცირე აქცია გალის სოფელ ნაბაკევში მოეწყო.