სენაკში დაკარგული ბავშვის საქმეზე ბრალდებულს პატიმრობა მიესაჯა
სენაკში დაკარგული 8 წლის ბიჭის საქმეზე დაკავებულს სენაკის სასამართლომ
აღმკვეთი ღონისძიების სახით პატიმრობა მიუსაჯა. მას ბრალი საქართველოს სისხლის სამართლის კოდექსის 129-ე მუხლით აქვს წაყენებული რაც სიცოცხლისთვის საშიშ მდგომარეობაში მყოფის დაუხმარებლობას გულისხმობს.სასამართლოსთან იმყოფებიან დაკარგულის ოჯახის წევრები და ნათესავები. ისინი შენობას მიწას ესვრიან. შეკრებილებმა სასამართლოში შეჭრა არაერთხელ სცადეს, თუმცა ადგილზე მობილიზებულმა პოლიციამ მათ ამის უფლება არ მისცა.
ბრალდებულის ადვოკატმა ლაშა ხოშტარიამ ჟურნალისტებს განუცხადა, რომ მისი დაცვის ქვეშ მყოფს ბრალი წუხელ წარედგინა.
როგორც ადვოკატმა აღნიშნა, დაკავებულის ინფორმაციით, მოზარდი მდინარე ტეხურაში გადავარდა, თუმცა მან დახმარება ვერ შეძლო რადგან ცურვა არ იცის. ლაშა ხოშტარიას ცნობითვე, ბრალდებულს ფსიქიკური პრობლემები აქვს.
სენაკში 8 წლის ბიჭი 24 თებერვალს გაუჩინარდა. მეორე დღეა რაც სამართალდამცავები და მაშველები მოზარდს მდინარე ტეხურაში ეძებენ. დაკარგულის ოჯახის წევრებმა 1 მარტს სენაკში აქციაც გამართეს. მათ პროტესტის ნიშნად ზუგდიდი-თბილისის ცენტრალური მაგისტრალის გადაკეტვა მოგვიანებით კი ბრალდებულის სახლის დაწვა სცადეს, თუმცა პოლიციამ მათ ამის უფლება არ მისცა. დაკარგულის ოჯახის წევრები მიიჩნევენ, რომ მათი შვილი დაკავებულმა ჯერ მოკლა და შემდეგ გადააგდო წყალში.