აფხაზეთის დე ფაქტო მთავრობამ ზუგდიდთან მოსაზღვრე სოფლების ხურჩა-ნაბაკევის და ორსანტია-ოტობაიის საკონტროლო-გამშვები პუნქტები დღეს, 5 მარტს საბოლოოდ დახურა. ხურჩის მცხოვრებმა დოდო თორიამ „ლაივპრესს“ უთხრა, რომ რუსეთის სამხედროებმა გამონაკლისი დაუშვეს და ზუგდიდში გადმოსულ აფხაზეთის ორ მკვიდრს უკან დაბრუნების უფლება მისცეს. გადასასვლელი, რითაც მოსახლეობას შეუძლია ისარგებლოს, მხოლოდ ენგურის ხიდია.

ხურჩა-ნაბაკევის და ორსანტია-ოტობაიის საკონტროლო-გამშვები პუნქტების შესაძლო დახურვა გალის მოსახლეობამ თებერვალში გააპროტესტა. მაშინ მოსახლეობა სოფელ ნაბაკვში და ენგურის ხიდთან შეიკრიბა. ამასთან, ადგილობრივმა მცხოვრებლემა შექმნეს საინიციატივო ჯგუფიც და ხელმოწერების შეგროვება დაიწყეს.

მიუხედავად პროტესტისა, გალის დე ფაქტო ადმინისტრაციამ მოსახლეობას მოუწოდა არ დაარღვიონ „სახელმწიფო საზღვარზე გადაადგილების“ წესი და 5 მარტიდან ისარგებლონ მხოლოდ ენგურის ცენტრალური ხიდით.

აფხაზეთის დე ფაქტო მთავრობამ ჯერ კიდევ გასული წლის მარტში შეიტანა ცვლილება „სახელმწიფოს საზღვრის შესახებ“ კანონში. ის სხვა ღონისძიებებთან ერთად საოკუპაციო საზღვრის უკეთ გაკონტროლების მიზნით საკონტროლო-გამშვები პუნქტების შემცირებას გულისხმობს.

დე ფაქტო მთავრობამ ახალი კანონის აღსრულება ჯერ კიდევ აპრილში დაიწყო, როცა გამშვები პუნქტი ზუგდიდის სოფელ შამგონას მოსაზღვრე თაგილონთან და წალენჯიხის სოფელ ფახულანის მოსაზღვრე ლეკუხონაში გააუქმა.

დე ფაქტო მთავრობის მონაცემებით, ადმინისტრაციულ საზღვარზე მოქმედი ოთხი საკონტროლო-გამშვები პუნქტიდან (ენგურის ხიდი, ხურჩა-ნაბაკევი, ორსანტია-ოტობაია, -ფახულანი-საბერიო) ყოველდღიურად, დაახლოებით, 1 500 ადამიანი გადადიოდა სამეგრელოს რეგიონში და იმდენივე ბრუნდება უკან, გალში.

3 მარტს ზუგდიდში მყოფმა შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა ჟურნალისტებს უთხრა, რომ საქართველოს მთავრობის პრიორიტეტი სწორედ აღნიშნული გადაწყვეტილების უკუქცევა იქნება.