სახელმწიფო უსაფრთხოების სამსახურში ადასტურებენ სამეგრელო-აფხაზეთის ადმინისტრაციულ საზღვართან სამი ქალის დაკავების ფაქტს. როგორც „ლაივპრესს“ სუსში განუცხადეს, მიმდინარეობს სამუშაოები მათ გასათავისუფლებლად.

„გიდასტურებთ, რომ სამი ქალბატონი დაკავებულია. ინფორმირებულია ევროკავშირის სადამკვირვებლო მისია და მიმდინარეობს სამუშაოები მათ გასათავისუფლებლად“, - აცხადებენ სუსში.

როგორც „ლაივპრესს“ ოტობაიელმა რესპონდენტმა, უთხრა სამი დაკავებულიდან ერთ-ერთი ნათესავებთან ერთად ზუგდიდიდან ოტობაიაში დედის დაკრძალვაზე მიდიოდა. მისი ინფორმაციით, ისინი სოხუმში წინასწარი დაკავების იზოლატორში არიან გადაყვანილი.

ცნობისთვის, 5 მარტიდან დე ფაქტო მთავრობამ ოფიციალურად ჩაკეტა ოტობაია-ორსანტიის და ხურჩა-ნაბაკევის ე.წ. საკონტროლო გამშვები პუნქტები. ოკუპირებულ რეგიონში მცხოვრებლებს დანარჩენ საქართველოში გადმოსვლა ზუგდიდის მუნიციპალიტეტში მხოლოდ ენგურის ხიდით და წალენჯიხაში საბერიო-ფახულანის ე.წ. გადასასვლელით შეუძლიათ.