ამ ეტაპზე გარკვეული არ არის როდის აღუდგება წყლის მიწოდება ზუგდიდში, ლაღიძის ქუჩის დევნილთა ჩასახლებას. როგორც „ლაივპრესს“ დევნილთა და განსახლების სამინისტროს აჭარისა და სამეგრელო-ზემო სვანეთის ტერიტორიული ორგანოს უფროსმა მანუჩარ ჩილაჩავამ განუცხადა, პრობლემის მოგვარებაზე მუშაობა დაწყებულია, თუმცა მისი გადჭრის ზუსტ ვადას ვერ აკონკრეტებს.

„წყლის საქაჩები ამოღებულია და დაშლილია. თუ ადგილზე შეიძლება მისი შეკეთება ადგილზე შეაკეთებენ, თუ არადა ქუთაისში იქნება წასაღები და შეიძლება ამან გარკვეული დრო მოანდომოს“, - აცხადებს მანუჩარ ჩილაჩავა.

მისი ინფორმაციით, პარალელურად მიმდინარეობს სამუშაოები, რომ გაერთიანებული წყალმომარაგების კომპანიამ მოვლა-პატრონობის ვალდებულებით დასახლების ჭაბურღილი ჩაიბაროს. ჩილაჩავას ინფორმაციით, ამ პროცესს ახალ უბანში წყლის მოსაკრებელზე არსებული დავალიანება აფერხებს.

„ჯერ-ჯერობით ეს ჭაბურღილი წყალკანალის ბალანსზე არ არის. ამაზეც მიდის მუშაობა, მაგრამ სანამ დავალიანება არ იქნება გადახდილი, წყალკანალს იურიდიული უფლებაც არ აქვს, რომ თავის ბალანსზე აიყვანოს“, - აცხადებს მანუჩარ ჩილაჩავა.

ზუგდიდში, ლაღიძის ქუჩის დევნილთა ჩასახლებაში კვლავ სასმელი წყლის მიწოდების პრობლემაზე საუბრობენ. ე.წ. ახალ უბანის მცხოვრებლების თქმით, მეოთხე დღეა მათთვის დაუდგენელი მიზეზით, წყლის მიწოდება შეუწყდეათ. ისინი ვარაუდობენ, რომ მწყობრიდან არის გამოსული მილები. როგორც დევნილები აცხადებენ, მათ წყლის მომარაგება საკუთარი ძალებით უწევთ. მსგავსი პრობლემა ახალ უბანში პირველად არ დაფიქსირებულა. გასული წლის აპრილში აქ წყლის დაბინძურების მიზეზით 111 ადამიანი მოიწამლა. მას შემდგეგ ახალი ჭაბურღილი გაითხარა, თუმცა დევნილები ამბობენ, რომ ყოველ თვე მაინც პრობლემები ექმნებათ.