სენაკში24 თებერვალს გაუჩინარებული ბავშვის ცხედარი იპოვეს. ეს ინფორმაცია „ლაივპრესს“საგანგებო სიტუაციების სამსახურის სამეგრელო-ზემო სვანეთის სამმართველოს უფროსმა თამაზ უბილავამ დაუდასტურა. მისი თქმით, ცხედარი შემთხვევით მეთევზეებმა ნახეს, თუმცა კონკრეტულად სად, ამაზე ინფორმაცია არ აქვს.

თამაზ უბილავას თქმით, შემთხვევის ადგილას თავადაც უახლოეს წუთებში მივლენ, სადაც სამართალდამცველები არიან მობილიზებულები.

სენაკში 8 წლის ბიჭი 24 თებერვალს გაუჩინარდა. მას სამართალდამცავები და მაშველები მოზარდს მდინარე ტეხურაში ეძებენ. დაკარგულის ოჯახის წევრებმა აქცია სენაკში რამდენჯერმე გამართეს და პროტესტის ნიშნად ზუგდიდი-თბილისის ცენტრალური მაგისტრალის გადაკეტვა, მოგვიანებით კი ბრალდებულის სახლის დაწვა სცადეს, თუმცა პოლიციამ მათ ამის უფლება არ მისცა.

დაკავებულს სენაკის სასამართლომ აღმკვეთი ღონისძიების სახით პატიმრობა მიუსაჯა. მას ბრალი საქართველოს სისხლის სამართლის კოდექსის 129-ე მუხლით აქვს წაყენებული რაც სიცოცხლისთვის საშიშ მდგომარეობაში მყოფის დაუხმარებლობას გულისხმობს.

გაუჩინარებული მოზარდის ოჯახი და ნათესავები აცხადებენ, რომ თავდაპირველად ბრალდებულმა მკვლელობა აღიარა, მას შემდეგ კი რაც საქმეში ადვოკატი ლაშა ხოშტარია ჩაერთო, ჩვენება შეცვალა. ოჯახს არ სჯერა ბრალდებულის ამჟამინდელი ჩვენების, რომ 8 წლის ბიჭს ფეხი დაუცდა და წყალში ჩავარდა, მან კი იმის გამო, რომ ცურვა არ იცოდა დახმარება ვერ შეძლო.