„ერთიანი ნაციონალური მოძრაობის“ ოფისში დღეს ბრიფინგი გამართა პარტიის წარმომადგენელმა ლევან თორიამ. ის გამოეხმაურა გუშინ, 2 მაისს ქალაქის საკრებულოს აპარატის უფროსის, გრიგოლ მიქავას დაკავების და შემდგომ გათავისუფლების ფაქტს.

ლევან თორიას თქმით, გათავისუფლება იმ მიზეზით მოხდა, რომ გრიგოლ მიქავას ჰყავს გავლენიანი ლობისტები, მათ შორის პროკურორ მამუკა ფიფიას, საკრებულოს აპარატის უფროსის ახლო ნათესავის სახით.

ამასთან, ენმ-ის წარმომადგენელმა აღნიშნა, რომ მოცემულ საქმეში ფიგურირებს ვინმე ლევან ხვიტია, რომელიც ასევე გუშინ დააკავეს. ლევან თორიას განმარტებით, ეს ადამიანი „ქართული ოცნების“ წევრია და სწორედ მის სახლში ფუნქციონირებდა ბოლო არჩევნებზე მმართველი პოლიტიკურის სუბიექტის საარჩევნო შტაბიც.

„ჩვენ ასევე გვაქვს ინფორმაცია, რომ დანაშაულებრივ საქმიანობაში იყო მაჟორიტარი დეპუტატის, მერაბ ქვარაიას ძმა. ის ამ საქმიდან გადამალეს. გადამალეს მაღალი თანამდებობის პირებმა და მათ შორის მისმა ძმამაც“, - განაცხადა ლევან თორიამ.

„ლაივპრესის“ კითხვის პასუხად, რომ გრიგოლ მიქავასთან ერთად დაკავებული ლევან ხვიტია თუ მმართველი პარტიის წარმომადგენელია, რატომ განხორციელდა მათზე დევნა, თორიას ინფორმაციით, ეს მოხდა შიდა დაპირისპირების საფუძველზე.

„ჩემი ინფორმაციით, დაპირისპირებაა გუბერნატორსა და მერაბ ქვარაიას და მის კლანს შორის. ლევან შონია, შენგელია და მეორე მხარეს ქვარაია-გოგოხია. ეს არის ძალაუფლებისთვის ბრძოლა“, - აღნიშნა მან.

ლევან თორია ითხოვს ხვალ, 4 მაისს, 14:00 საათზე მათთან ერთად ნარკოლოგიური შემოწმება გაიარონ ქალაქის მერიის და გამგეობის მაღალი თანამდებობის პირებმა, რადგან განმარტავს, რომ ამ ფაქტებმა ბევრი კითხვის ნიშანი გააჩინა.

„ქართული ოცნება“ სიფხიზლეში არაფრის მაქნისია და თქვენ წარმოიდგინეთ ნარკოტიკული თრობის ქვეშ რა მასშტაბის მავნებლობის საფრთხის წინაშე ვდგავართ. „ნაციონალური მოძრაობის“ მმართველობის დროს პირები, რომლებიც თავს ასაღებდნენ პოლიტიკურ პატიმრებად, პოლიტიკურ დევნილებად, თანდათან ცხადი ხდება, რომ ისინი ნამდვილად იყვნენ ნარკოტიკების რეალიზატორები, ბარიგები, ნარკოტიკების მომხმარებლები. და ეს პირები მართავენ დღეს ჩვენს ქალაქს და ქვეყანას“, - განმარტა მან.

თუკი მათ შეთავაზებას არ გაიზიარებენ ადგილობრივი ხელისუფლების წარმომადგენლები, ლევან თორია ამბობს, რომ გაასაჯაროვებენ ყველა იმ პირს, ვინც ენმ-ის მმართველობის პირობებში ნარკოტიკების თემით იყო დაინტერესებული. ისინი ასევე გეგმავენ მიმართონ პროკურატურას და სხვა ორგანოებს, რათა შეისწავლონ ადგილობრივ ხელისუფლებაში არსებული ვითარება, ნარკოტიკების მოხმარების თუ შეძენა-შენახვის კუთხით.

ადგილობრივი თვითმმართველობის წარმომადგენელთა და მაჟორიტარი დეპუტატის საპასუხო კომენტარებს „ლაივპრესი“ ცოტა ხანში შემოგთავაზებთ.

ნარკოტიკული საშუალების მოხმარების საფუძველზე დაკავებული ზუგდიდის საკრებულოს აპარატის უფროსი გრიგოლ მიქავა დაკავებიდან 12 საათის შემდეგ გაათავისუფლეს. გრიგოლ მიქავამ საექსპერტო-კრიმინალისტიკური დეპარტამენტი ისე დატოვა, რომ კომენტარი არ გაუკეთებია.

ქალაქ ზუგდიდის საკრებულოს აპარატის უფროსი ადმინისტრაციული სამართალდარღვევისთვის, 45-ე მუხლის საფუძველზე დააკავეს, რომელიც ნარკოტიკული საშუალებების მოხმარებას გულისხმობს.

რაც შეეხება მეორე პირს, ზუგდიდის მცხოვრებ ლევან ხვიტიას, ის 260-ე მუხლით არის დაკავებული, რაც გულისხმობს ნარკოტიკული საშუალების, მისი ანალოგის ან პრეკურსორის უკანონო დამზადებას, წარმოებას, შეძენა-შენახვა-გადაზიდვას, გადაგზავნას ან გასაღებას, და ისჯება თავისუფლების აღკვეთით 11 წლამდე.