ზუგდიდში, ახალ უბანში ბავშვთა საერთაშორის დღისადმი მიძღვნილ ღონისძიებაზე საბავშვო ბაღის გახსნა მოითხოვეს. ლაღიძის ქუჩის მცხოვრებლები საბავშვო ბაღის მშენებლობას ან ახლოს მდებარე დაწესებულებების გაფართოებას და მათთვის ადგილების გამოყოფას ითხოვენ.

სადღესასწაულო წვეულება, სადაც ანიმაციური ფილმების გმირებთან ერთად ბავშვები მუსიკაზე ცეკვავდნენ, ფეხბურთის მინი სტადიონზე გაიმართა. სწორედ მოედნის შესასვლელთან იყო გაკრული ბანერი აქციის მთავარი სლოგანით - „98 ბავშვი საბავშვო ბაღის მოლოდინში“.

ღონისძიება დანიის ლტოლვილთა საბჭოს ფინანსური მხარდაჭერით არასამთავრობო ორგანიზაცია „ერთსულოვნებამ“ მოაწყო. მისი ხელმძღვანელი კახა ჯინჯოლია იმედს გამოთქვამს, რომ მომავალ წელს მოზარდები დღესასწაულს აფხაზეთში შეხვდებიან.

დასახლებას, რომ საბავშვო ბაღი სჭრდება, ეს მოთხოვნა უბნის მცხოვრებლებმა აპრილშიც დააფიქსირეს. საინიციატივო ჯგუფმა, რომელშიც ახალი დასახლების და მიმდებარე ქუჩის მცხოვრებლები არიან გაერთიანებული, თხოვნით მიმართა ქალაქის მერიას, სახალხო დამცველს და პრემიერ-მინისტრს. საინიციატივო ჯგუფის წევრების თქმით, აღწერეს როგორც დასახლება, ასევე მეზობელი უბნები. მიღებული მონაცემებით საბავშვო ბაღის გარეშეა დარჩენილი 98 დევნილი და 7 ადგილობრივი ბავშვი.

ბავშვთა საერთაშორისო დღე მსოფლიოში 1950 წლიდან აღინიშნება. მისი მიზანი შეხსენებაა, რომ სახელმწიფო ვალდებულია, უზრუნველყოს თითოეული ბავშვის კეთილდღეობა, რაც გულისხმობს მათი სიცოცხლისა და ჯანმრთელობის, ხელმისაწვდომი განათლებისა და ცხოვრების სათანადო პირობებით სარგებლობის უფლებათა განხორციელებას.