წალენჯიხის მუნიციპალიტეტის სოფლების საჩინოს და მედანის მოსახლეობა საპროტესტო აქციებს განაახლებს იმ შემთხვევაში თუ მათი მოთხოვნები არ შესრულდება. მოქალაქეების ნაწილმა დღეს საავტომობილო გზის შეკეთებისა და სასმელი წყლის მიწოდების მოთხოვნით წალენჯიხის გამგეობასთან საპროტესტო აქცია გამართა. აქციის მონაწილეების განცხადებით, სხვადასხვა ხელისუფლების პირობებში გაცემული არაერთი დაპირების მიუხედავად ამ დრომდე უშედეგოდ ელოდებიან საჩინოს და მედანის ცენტრალური გზების შეკეთებას.

ამასთან მედანის მცხოვრებლების განცხადებით, გზის შეკეთების პარალელურად ისინი ითხოვენ სასმელი წყლის მიწოდების აღდგენას. აქციის მონაწილეების ინფორმაციით, სოფელში წყლის მილები გაიყვანეს, სამუშაოები დასრულდა, თუმცა სავარაუდოდ სამშენებლო ხერვეზების გამო წყლის ჩართვა ვერ ხერხდება.

აქციის მონაწილეებს დღეს გამგებელი შეხვდა. მესიკ ფარცვანიას მტკიცებით, გზების შეკეთების დაგვიანება ტენდერთან დაკავშირებულმა პრობლემამ გამოიწვია. მისი თქმით, 2016 წელს გამოცხადებულ ტენდერში გამარჯვებულმა კომპანიამ ვერ წარადგინა შესაბამისი დოკუმენმტაცია, რისთვისაც ის დაჯარიმდა, ტენდერი კი ხელახლა გამოცხადდა.

„ტენდერის დასრულების შემდეგ შემუშავდა პროექტები, რომელიც რეგიონული განვითარების სამინისტროს წარედგინა. აქ ამ დრომდე მისი დეტალურად დამუშავება მიმდინარეობს“, - განმარტა გამგებელმა.

ბესიკ ფარცვანიას თქმით, დაახლოებით ერთ თვეში ელოდებიან სამინისტროსგან პროექტებს, რომლის მიხედვითაც მოხდება სამუშაოების დაწყება.

რაც შეეხება სოფელ მედანში სასმელი წყლის პრობლემას, გამგებლის თქმით, აღნიშნულ საკითხში არ არის „ღრმად გარკვეული“, ამ დღეებში გაეცნობა პრობლემას და ორშაბათს ექნება პასუხი, თუ რასთან გვაქვს საქმე. ბესიკ ფარცვანიას თქმით, ეს არის პროექტი, რომელიც მის გამგებლობამდე განხორციელდა.