საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის განცხადებით, სოფელ ჩვიბიანში ჩამოშლილი XV საუკუნეების კოშკის გაწმენდითი სამუშაოები ბევრ ნიუანსს გამოაჩენს მის თავდაპირველ სახესთან დაკავშირებით. სწორედ ამიტომ, როგორც ნიკოლოზ ანთიძე აცხადებს, არ ჩქარობენ და კოშკის რეკონსტრუქციის პროექტის შედგენა დაიწყება მას შემდეგ რაც გაწმენდითი სამუშაოები დასრულდება. შესაბამისი განცხადება კულტურული მემკვიდრეობის დაცვის ეროვნული სააგენტოს გენერალურმა დირექტორმა საზოგადოებრივი მაუწყებლის პირველის არხის გადაცემა „c სტუდიაში“ გააკეთა.

რაც შეხება სვანეთში კულტურული ძეგლების ნგრევის პრევენციულ ღონისძიებებს ანთიძის სიტყვებით, პრევენცია, მსგავსი ნგრევა, რომ არ მოხდეს არ არსებობს, რადგან სხვა შემთხვევაში უნდა მოხდეს ამჟამად მძიმე მდგომარეობაში მყოფი 160 ძეგლის სრული რეკონსტრუქცია რისი არც ადამიანური და არც ფინანსური რესურსი სააგენტოს არ გააჩნია:

„ჩვენ ადგილობრივი მოსახლეობის და ადგილობრივი ხელისუფლების დახმარებით, იდენტიფიცირებული გვავქს 160-მდე ობიექტი, რომელიც სასწრაფო გადაუდებელ სამუშაოებს საჭიროებს. შარშან 170 იყო. წელს 10 ობიექტის რეაბილიტაციაა ჩასმული, ტენდერიც გამოცხადებულია და დაიწყება ფიზიკური სამუშაოები. გარდა ამისა ჩაჟაშის რეაბილიტაცია მიმდინარეობს უკვე სამი წელიწადია და 2 წელიწადში მთლიანი სოფელი იქნება აღდგენილი იმ თავდაპირველი სახით, როგორიც ჩვენამდე შემოინახა. პრობლემა არის ის, რომ პრევენცია როდის რა ჩამოინგრევა ნამდვილად არ არსებობს. 160 ძეგლიდან რომელს რა ბუნებრვი პირობები მოუსწრებს, იქნება ეს კატაკლიზმები თუ ბევრი სხვა მიზეზი, არავინ არ არიცის და ამის პრევენციას ვერ გააკეთებ. პრევენცია არის ის, რომ მთლიანად რესტავრაცია გააკეთო. პრობლემა კი არის ის, რომ 160 ძეგლის მთლიან რესტავრაციას მარტო სვანეთში დღეს არსებული მდგომარეობით არც ადამიანური რესურსი და ფინანსური რესურსი არ ეყოფა. ფინანსურს, რომ თავი დავანებოთ ამას ადამიანური რესურსი სჭირდება, პროფესიონალი და კვალიფიციური ადამიანები სჭირდება ვინც მუშაობენ ძეგლებზე და ვინც აღადგენენ. ამიტომაც ჩვენ ეტაპობრივად ვახორციელებთ ამ სამუშაოებს“, - განაცხადა ნიკოლოზ ანთიძემ.

მისივე ინფორმაციით, ამ ეტაპზე სვანეთში რეკოსნტრუქციის თვალსაზრისით აქცენტი კეთდება მნიშვნელოვან ძეგლებზე, მათ შორის არის მაჩუბები (ისტორიული სვანური სახლები).

ნიკოლოზ ანთიძის განმარტებით, სააგენტო ქვეყნის მასშტაბით აღსადგენი უამრავი ობიექტისგან პრიორიტეტულს განსაზღვრავს მისი მნიშვნელობის გათვალისწინებით.

სოფელ ჩვიბიანში XV საუკუნეების მურყვამის - სვანური კოშკი 22 ივნისს ჩამოინგრა. მეორე დღეს, უშგულის მოსახლეობამ საპროტესტო აქცია გამართა. მათი თქმით, თუ შესაბამისი უწყებები დროულად არ მიხედავენ შექმნილ ვითარებას, შესაძლოა ყველა კოშკი ჩამოინგრეს. საქართველოს კულტურული მემკვიდრეობის დაცვის ეროვნული სააგენტოს რესტავრატორთა ჯგუფი სოფელ ჩვიბიანში ჩამოშლილი საგვარეულო კოშკის გაწმენდით სამუშაოებს შეუდგა.