კულტურული მემკვიდრეობის დაცვის ეროვნული სააგენტოს დირექტორ ნიკოლოზ ანთიძის განცხადებით, მთავრობის გადაწყვეტილებით უშგულში ახალ მშენებლობებზე მორატორიუმი გამოცხადდა. შეჩერებულია ნებართვების გაცემაც, განაშენიანების რეგულირების გეგმის შედგენამდე.

ნიკოლოზ ანთიძე ამბობს, რომ ეკონომიის სამინისტრომ უკვე დაიწყო მუშაობა მოცემულ გეგმაზე, რომელიც აღნიშნულ ტერიტორიაზე ყველასთვის დაადგენს „თამაშის წესებს“, ვის სად და როგორ შეეძლება სამუშაოების წარმოება, იქნება ეს ახალი მშენებლობები თუ უკვე არსებული ძეგლების განვითარება.

„ეს დოკუმენტი სავალდებულო იქნება ყველასთვის. ჩვენი გათვლებით, ის დაახლოებით 7-8 თვეში უნდა მოზადდეს. დოკუმენტი შეიმუშავებს იმ ეტაპებსაც, როდის რისი რეკონსტრუქცია მოხდეს. შეიძლება რაღაც ახალი მშენებლობა არის, მაგრამ იყოს მისი სწორი ინტეგრირება სწორ გარემოში“, - განმარტა ნიკოლზ ანთიძემ.

მისივე თქმით, მუდმივად საუბრობს ადგილობრივ მოსახლეობასთან იმაზე, რომ თუ ასე გაგრძელდება, აღარ იქნებიან უშგულის მონახულების მსურველები, რადგან მრავალსართულიანი შენობების და საცხოვრებლების პირობებში ის დაკარგავს იმ განსაკუთრებულობას, რითაც დღეს ტურისტებს იზიდავს.

სააგენტოს დირექტორი აღნიშნავს, რომ მსგავსი მიდგომა შესაძლოა შემაფერხებელიც იყოს მცირე ბიზნესისთვის, ვისაც აქ საკუთარი საწარმოს და სასტუმროს გახსნა სურს. თუმცა მისივე განმარტებით, საბოლოო ჯამში ეს ყველაფერი გათვლილია იმაზე, მომდევნო წლებში ადამიანს ჰქონდეს უკეთესი გარემო და მეტი სარგებლის მიღებაც შეძლოს.

ნიკოლოზ ანთიძის თქმით, უშგული ტურისტებით და ვიზიტორებით ყველაზე დატვირთული ადგილია, რამაც აღნიშნულ ტერიტორიაზე თვითნებური ჩარევები გამოიწვია, მათ შორის საცხოვრებელი სახლების შეუსაბამო ადგილზე აშენების კუთხით.

„ჩვენ ჩაჟაშის რეკონსტრუქცია დავიწყეთ ზუსტად იმ მიზნით, რომ ეს იყო ერთადერთი სოფელი, რომელიც თავისი ავთენტურობით მაქსიმალურად იყო შემორჩენილი და ნეგატიური ზეგავლენები ნაკლებად იყო. დანარჩენ სოფლებში, მუყმელში იქნება, ჩვიბიანში თუ ჟვიბიანში, გარკვეული ჩარევები უკვე არსებობს, რომლის გამოსწორება უფრო შემდგომი ეტაპისთვის გადაიდო გამომდინარე იქიდან, რომ ჩვენამდე შემონახული გადაგვერჩინა და აღგვედგინა“, - შესაბამისი განცხადება კულტურული მემკვიდრეობის დაცვის ეროვნული სააგენტოს გენერალურმა დირექტორმა საზოგადოებრივი მაუწყებლის პირველის არხის გადაცემა „c სტუდიაში“ გააკეთა.

სოფელ ჩვიბიანში XV საუკუნეების მურყვამის - სვანური კოშკი 22 ივნისს ჩამოინგრა. მეორე დღეს, უშგულის მოსახლეობამ საპროტესტო აქცია გამართა. მათი თქმით, თუ შესაბამისი უწყებები დროულად არ მიხედავენ შექმნილ ვითარებას, შესაძლოა ყველა კოშკი ჩამოინგრეს. საქართველოს კულტურული მემკვიდრეობის დაცვის ეროვნული სააგენტოს რესტავრატორთა ჯგუფი სოფელ ჩვიბიანში ჩამოშლილი საგვარეულო კოშკის გაწმენდით სამუშაოებს შეუდგა.