პრეზიდენტის წარმომადგენლებმა მოისმინეს ყველა არგუმენტი და გადაწყვეტილებას, გამოიყენებს თუ არა პრეზიდენტი ვეტოს უფლებას, კონსულტაციების შემდეგ მიიღებს, - განაცხადა გიორგი მარგველაშვილის საპარლამენტო მდივანმა ანა დოლიძემ არასამთავრობო ორგანიზაციებთან შეხვედრის დასრულების შემდეგ.

მისივე თქმით, განაგრძობენ კანონპროექტზე მუშაობას, რომელიც ამ დრომდე არ მიუღიათ და მუდმივად მიაწვდიან საზოგადოებას ინფორმაციას მის შესახებ.

„თავიდანვე პრეზიდენტი სკეპტიკურად იყო განწყობილი გარკვეული ცვლილებების მიმართ ამ კანონპროექტში, რომელიც ეხებოდა 7 ქალაქისთვის ქალაქის სტატუსის ჩამორთმევას . ჩვენ ყველანი მიჩვეულები ვართ, რომ გორი, თელავი ქალაქია, მაგრამ აქ წარმოითქვა არასამთავრობოების მიერ ბევრად მეტი შენიშვნა. მათ შორის ის, რომ გამოტოვებული იყო სერიოზული ეტაპი ამ კანონპროექტის მიღების – ხალხისთვის კითხვა, რა სურთ მათ. აქედან გამომდინარე ჩვენ ამ შენიშვნებზე ვიფიქრებთ და ჩამოვაყალიბებთ პოზიციას”, - განმარტა ანა დოლიძემ.

„ნეტგაზეთის“ ინფორმაციით, შეხვედრის დასრულების შემდეგ არასამთავრობო ორგანიზაციების წარმომადგენლების განცხადებით, მათ პრეზიდენტის წარმომადგენლებს საკუთარი პოზიცია წარუდგინეს და იმედი გამოტქვეს, რომ გიორგი მარგველაშვილი პროცესებში ჩაერთვება, რაც პარლამენტის მიერ მიღებულ კანონპროექტს ვეტოს დადებაში გამოიხატება.

„სიდას” აღმასრულებელი დირექტორის, ზვიად დევდარიანის თქმით, პროცესი სამართლებრივი დებულებების დარღვევით წარიმართა, რაც არასამთავრობოებმა გაასაჩივრეს. მანვე განმარტა, რომ საკითხი მნიშვნელოვანია, რადგან ცვლილებით 100 000-ობით ადამიანს ერთმევა შესაძლებლობა, აირჩიონ საკუთარი თვითმმართველობა, ჰქონდეთ საკუთარი პრიორიტეტები და ჩართულნი იყვნენ გადაწყვეტილების მიღების პროცესში.

„საიას“ წარმომადგენელ ირმა პავლიაშვილის თქმით, ცვლილებებზე მოსახლეობასთან კონსულტაცია არ გამართულა, მათ შორის იმასთან დაკავშირებით, თუ რას ფიქრობენ ისინი ისინი ტერიტორიულ გაერთიანებაზე.

„ეს არგუმენტები მივაწოდეთ, შევთანხმდით იმაზე, რომ სამომავლო თანამშრომლობაც გაგრძელდება. პრეზიდენტის ადმინისტრაცია დეტალურად შეისწავლის საკითხს. ჩვენ იმედი გვაქვს, რომ სწორედ ისინი გაითვალისწინებენ ჩვენს პოზიციას ვეტოს გამოყენებასთან დაკავშირებით”, - აღნიშნა მან.

მუნიციპალიტეტების გაერთიანების შესახებ კანონპროექტს მხარი პარლამენტმა უკვე ორი მოსმენით დაუჭირა.

რეგიონული განვითარების სამინისტროს სამთავრობო კომისიის ინიციატივა თავის დროზე ქვეყნის მასშტაბით საკრებულოებმა დაპირისპირების ფონზე დაამტკიცეს, მათ შორის ზუგდიდშიც.