ზუგდიდის შალვა დადიანის სახელობის თეატრის რეკონსტრუციისთვის ჯამში 10 მილიონ ლარამდე დაიხარჯება. მათ შორის მილიონ 800 ათას ლარია განსაზღვრული გამაგრების სამუშაოებისთვის. აღდგენის პროექტის ღირებულება კი 8 მილიონ 100 ათასს შეადგენს. თეატრის ხელმძღვანელმა ზურაბ ეგუტიამ „ლაივპრესს“ უთხრა, რომ ამ თანხიდან 4 მილიონი სცენის მოსაწყობად იქნება საჭირო. კერძოდ, განათება-გახმოვანების თუ აკუსტიკისთვის. შენობა უახლესი ტექნიკით აღიჭურვება.

„4 ათას 300 კვ.მ იქნება თეატრი. თითქმის ორმაგდება. თუ არის ორსართულიანი, გახდება ოთხსართულიანი. აქ იქნება ყველაფერი, სადეკორაციო, სამკერვალო, სტილისტი, საგრიმიორო, სადურგლო, სახელოსნოები. ასევე ორი კაფე და დიდი საკონფერენციო დარბაზი. ახალ თეატრში იქნება ყველაფერი, თუ რამ არსებობს და საჭიროა“, - გვითხრა ზურაბ ეგუტიამ.

მისივე ინფორმაციით, რეკონსტრუირებულ შენობაში ორი სცენა მოეწყობა. ერთი უკვე არსებულზე ცოტათი დიდი, მეორე კი მცირე, 150 ადამიანზე გათვლილი.

სარემონტო სამუშაოები უახლოეს კვირებში დაიწყება და ის დაახლოებით ორ წელიწადს გასტანს.

მანამდე დასი ზუგდიდის ბაზრის წინ მდებარე კულტურის სახლში გადავა, ადმინისტრაცია კი სოციალური მომსახურების სააგენტოს შენობის მესამე სართულზე იფუნქციონირებს რეკონსტრუქციის დასრულებამდე:

„მერიას მივმართეთ წერილით და დაგვეხმარა. კულტურის სახლიც გვერდში დაგვიდგა და გვთხრა, ყველანაირად დაგეხმარებითო. გადმოგვცა სცენა, სადეკორაციოები. სველი წერტილებია გასარემონტებელი. მერიამ გვითხრა, ამასაც ჩვენ გავაკეთებთო. ადმინისტრაცია ალბათ იქითა კვირაში გადავალთ. კულტურის სახლში კი, როგორც კი აქ შემოვა „ქართუ“, დავიწყებთ სცენის და ყველაფრის გადატანას“.

ზურაბ ეგუტიამ სხვა სიახლეების შესახებაც მოგვაწოდა ინფორმაცია. მისი თქმით, მათი სტუდიის ხუთი ახალგაზრდა ბათუმის თეატრალურ უნივერსიტეტში ჩაირიცხნენ, როემლთა დაფინანსებასაც მერია იღებს საკუთარ თავზე.

რაც შეეხება ახალ სპექტაკლს, აგვისტოს თვეში რეჟისორ გოგა თავაძეს ელოდებიან. რამდენიმე ვარიანტიდან ერთი თემატიკის დადგმაზე შეჯერდებიან, რომლითაც სექტემბერში ახალ სეზონს გახსნიან.

ზუგდიდის თეატრის შენობა მძიმე მდგომარეობაშია. იმის გამო, რომ შენობაში ყოფნა სახიფათოა, აქ უკვე დიდი ხანია სეპექტაკლებს არ უჩვენებენ.

2018 წელს თეატრს 150 წელი შეუსრულდება.