მესტიის მუნიციპალიტეტის მულახის თემში მიხეილ ხერგიანის სახელობის საერთაშორისო ტურნირი მიმდინარეობს კლდეზე ცოცვაში. მასში მონაწილეობას ქართველებთან ერთად აზერბაიჯანელი და თურქი სპორტსმენები იღებენ. საერთო ჯამში 80 მონაწილეა ჩართული.

ზაურ ჩართოლანმა, საქართველოს მეკლდეურობის ეროვნული ფედერაციის დამფუძნებელმა, რომელიც ამავდროულად მესტიის საკრებულოს თავმჯდომარის მოადგილეა, „ლაივპრესს“ განუცხადა, რომ გასულ წელბში ტურნირი მესტიაში ტარდებოდა თუმცა წელს ის მულახის თემში, ახლადგახსნილ სპორტულ კომპლექსში მიმდინარეობს. ზაურ ჩართოლანის თქმით, კომპლექსში, რომელიც დაღუპული მეკლდევე ილიკო გაბლიანის სახელობისაა, მეკლდეურებისთვის მოწყობილია მსოფლიო სტანდარტების სპეციალური კედლები, იქვე განთავსებულია სასტუმრო სადაც შეჯიბრის მონაწილე სპორტსმენები და მსაჯები ცხოვრობენ.

სპორტული ღონისძიება 19 სექტემბერს დაიწყო და ხვალ დასრულდება. პირველ დღეს მონაწილეებს ჰქონდათ სწრაფი ცოცვის ეტაპი, დღეს ისინი რთულ ცოცვაში შეეჯიბრებიან ერთმანეთს, ხვალ კი კლდის მონაკვეთზე ინდივიდუალურ ცოცვაში.

გამარჯვებულები მედლებისა და სიგელების პარალელურად ფულადი ჯილდოებით დასაჩუქტრდებიან. როგორც ზაურ ჩართოლანი აცხადებს, მესტიის თვითმმართველობისა და მეკლდეურობის ეროვნული ფედერაციის მიერ დაფინანსებული ტურნისრის ფულადი ჯილდო დიდი ოდენობის არ არის. ის 200, 150 და 100 ლარით არის განსაზღვრული.

ცნობილი ქართველი ალპინისტის მიხეილ ხერგიანის სახელობის ტურნირი ტრადიციულად წლების განმავლობაში გაგრაში ტარდებოდა, შემდეგ კი კვარიათში. 2009 წლიდან ის მესტიაში იმართება. ტურნირს 2011 წელს მიენიჭა საერთაშორისო სტატუსი.