ანაკლიის ციხესიმაგრეში ევროპის მემკვიდრეობის დღეები გაიმართა, სადაც დადიანების სასახლეში დაცული ევროპის ხედების ამსახველი ფოტოკოლექცია გამოიფინა.
„მოგეხსენებათ, რომ დადიანებს ნათესაური და კულტურული კავშირები ჰქონდათ ევროპასთან. საფრანგეთის იმპერატორის, ნაპოლეონ ბონაპარტის დის შვილიშვილი აშილ მიურატი გახლდათ სალომე დადიანის მეუღლე და სწორედ მან ჩამოიტანა ნაპოლეონის მემორიალური ნივთები სამეგრელოში. დღეს აქ გამოფენილია დადიანების კოლექციაში დაცული ფოტოები, რომლებიც მე-19 საუკუნის ევროპას ასახავს. ძირითადად, საფრანგეთისა და შვეიცარიის ხედებია“, - გვითხრა მუზეუმის თანამშრომელმა მართა მეფორიამ.

„ევროპის მემკვიდრეობის დღეების“ 2017 წლის თემაა - „მემკვიდრეობა და ბუნება, შესაძლებლობათა ლანდშაფტი“. მართა მეფორიას თქმით, ამიტომაც, საჯარო სკოლის მოსწავლეებმა ანაკლიის პეიზაჟები დახატეს.
ევროპის მემკვიდრეობის დღეები უმეტესად ყოველი წლის შემოდგომაზე, ერთ-ერთ შაბათ-კვირას იმართება. ის წარმოადგენს ევროპულ ღირებულებებზე დაფუძნებულ ღონისძიებათა ერთობლიობას, რომელიც გამოფენებს, კონფერენციებს, საჯარო ლექციებს და საგანმანათლებლო პროგრამებს აერთიანებს.

მისი მიზანია ევროპის კულტურული კონვენციის ხელმომწერი ქვეყნების კულტურული მემკვიდრეობის, როგორც საერთო ევროპული მემკვიდრეობის შესახებ ცნობიერების ამაღლება.

„ევროპის მემკვიდრეობის დღეები“ წარმოადგენს ევროპის საბჭოსა და ევროკომისიის ერთობლივ პროგრამას, რომელშიც 1999 წლიდან მონაწილებას იღებს ევროპის კულტურული კონვენციის ხელმომწერი 50 ქვეყანა, მათ შორის საქართველო.