აფხაზეთის დე ფაქტო რესპუბლიკის მთავრობის გადაწყვეტილებით, ბინადრობის მოწმობის მფლობელს საკუთრების უფლება არ შეეზღუდება, თუმცა ქონების გასხვისებას ის მხოლოდ „აფხაზეთის მოქალაქეზე“ შეძლებს. შესაბამისი განმარტება გალის დე ფაქტო ადმინისტრაციის ხელმძღვანელმა თემურ ნადარიამ გააკეთა, რადგან როგორც თავად განმარტავს, საკუთრების უფლება ის საკითხია რაც დღეს გალელებს ძალიან აწუხებთ.

ინტერვიუში, რომელსაც გამოცემა „აფხაზია ინფორმი“ ავრცელებს, დე ფაქტო ადმინისტრაციის ხელმძღვანელი ბინადრობის მოწმობის გაცემის პირობებზე საუბრობს. მისი სიტყევბით, დროებითი დოკუმენტის გაცემისას საპსორტო განყოფილებაში დაფიქსირდა დარღვევებიც, კერძოდ კი მისი რიგის გარეშე გაცემის სანაცვლოდ ქრთამის აღების მცდელობა, რაც აღიკვეთა.

ნადარაიას ინფორმაციით აღიძრა სისხლის სამართლის საქმე ერთი პირის მიმართ, რომელიც 2 ათასი რუბლის სანაცვლოდ რიგში მდგომთ ყალბ დოკუმენტებს აძლევდა.

„იყო ასეთი შემთხვევაც როცა რამდენიმე პირი მიდიოდა სოფელში და მოსახლეობას ეუბნებოდა, რად გინდათ საპასპორტო განყოფილებაში წასვლა, ჩვენ გაგიკეთებთ ამ ყველაფერს თანხის სანაცვლოდ. ხალხი ამას თანხმდებოდა. ასეთი, რომ არ განმეორდეს, დოკუმენტების გაფორმების პროცესში ჩავრთეთ სამოქალაქო საზოგადოების და ადმინისტრაციის წარმომადგენლები. ახალა ისინი ესწრებიან პროცესს საპასპორტო განყოფილებაში“, - აცხადებს თემურ ნადარაია.

აფხაზეთის დე ფაქტო რესპუბლიკის საპასპორტო განყოფილების ინფორმაციით, სამ თვეში, მას შემდეგ რაც დაიწყო ბინადრობის მოწმობების გაცემა, გალში, ტყვარჩელსა და ოჩამჩირის რაიონებში 500-მა მცხოვრებმა მიიღო დოკუმენტი და იმდენივე უკვე მზად არის გასაცემად. საერთო ჯამში დე ფაქტო მთავრობა გეგმავს 22 ათასი ბინადრობის მოწმობის გაცემას. დოკუმენტის მოქმედების ვადა 5 წელია.

გალში ბინადრობის მოწმობების გაცემა ზაფხულიდან დაიწყო. დოკუმენტის მიღებაზე უარს ამბობს ოკუპირებულ ტერიტორიაზე მცხოვრებთა ნაწილი. მოქალაქეები შიშობენ, რომ მისი აღების შემთხვევაში საკუთრების უფლება შეეზღუდებათ. გალელების პროტესტს იწვევს ისიც, რომ მათ უცხო ქვეყნის მოქალაქეებზე გათვლილ საბუთს აძლევენ, მაშინ, როცა ეს მათი მუდმივი საცხოვრებელი ადგილია, როგორც ავტოქთონი მოსახლეობის.