სვანურ კოშკებს შორის აგებული ოთხსართულიანი საცხოვრებელი სახლი, რომლის ფოტოც სოციალურ ქსელ ფეისბუკით გავრცელდა, მესტიის უბანში, ლანჩვალში მდებარეობს. ის ადგილობრივი მცხოვრებლების, გოშთელიანების საგვარეულო სახლია, თუმცა ახლა არავინ ცხოვრობს.

როგორც „ლაივპრესს“ მესტიის მუნიციპალიტეტის გამგებელმა კაპიტონ ჟორჟოლიანმა განუცხადა, თავდაპირველად ტიპიური სვანური სახლი იყო და ამ ფორმით რეკონსტრუქცია 2002 წლიდან 2004 წლამდე ჩაუტარდა.

„თვითონ მეპატრონე რუსეთში მოღვაწეობდა და გარდაცვლილია. სახლში არავინ ცხოვრობს. სახლი იდგა და მას გაუკეთეს რესტავრირება. ნებართვისთვის არვისთვის მიუმართავთ. ეს იყო სვანური საცხოვრებელი სახლი, გადაღებეს და სახურავი სხვანაირად დაახურეს“, -  განმარტა მესტიის გამგებელმა.

მისი ინფორმაციით, სამომავლოდ დაგეგმილია სახლს მიეცეს გარემოსთვის შესაბამისი ფორმა. როგორც კაპიტონ ჟორჟოლიანი ამბობს, კულტურული მემკვიდრეობის დაცვის ეროვნულმა სააგენტომ ამ უბანში ერთ მესამედზე მეტ ძეგლს რესტავრაცია ჩაუტარა.

„მოვა ამისი (სახლის) დროც. ახლა უკვე იდება განაშენიანების რეგულირების გენ გეგმა და იმაში ეს ზონა და ეს ზოლი განსაკუთრებული დაცვის ქვეშ არის მოქცეული. იგეგმება ამ შენობის გადახედვა, ფერის შეცვლა და სახურავის შეცვლა“, - განაცხადა კაპიტონ ჟორჟოლიანმა.

კულტურული მემკვიდრეობის დაცვის ეროვნული სააგენტოს გენერალური დირექტორის მოადგილე დავით ლომიტაშვილის ინფორმაციით, ამ ეტაპზე კონკრეტულად არ არის განსაზღვრული, თუ რა ღონისძიებას მიმართავენ გოშთელიანების სახლთან დაკავშირებით.

როგორც მან „ლაივპრესთან“ საუბარში განაცხადა, ამ სახლის ბედი გადაწყდება კონკრეტულად ლანჩვალში მიმდინარე სარეკონსტრუქციო სამუშაოების ფარგლებში.

„მთლიანი რეაბილიტაციის პროცესში, აი როგორც ჩაჟაშში ხდება, თუ ეს ნაგებობა არის შეუსაბამო, ამ შემთხვევაში დადგება ეს საკითხი. იმისთვის, რომ კერძო საკუთრების ხელშეუხებლობის პრეზუმცია არ შედგეს, სახელმწიფო უნდა დაელაპარაკოს, მისცეს შესაბამისი ანაზღაურება, რაც დაუჯდა და ა.შ. მაგრამ ამას ყოველგვარი ვადები გასული აქვს 2002 წლის შემდეგ. რა თქმა უნდა, თუ დადგა საკითხი ამ კოშკების რეაბილიტაციის და ირგვლივ ინფრასტრუქტურის მოწყობის, მაშინ შეიძლება დადგეს საკითხი ამ სახლის პროექტის შესაბამისად, რომელიც საბჭოზე უნდა გავიდეს და მოიწონონ, დემონტაჟი იქნება ეს, სხვანაირი სახის მიცემა იქნება ეს თუ სხვა“, - განაცხადა დავით ლომიტაშვილმა.

მისი თქმით, წლების წინ სვანეთში არაერთი მსგავსი მშენებლობა მოხდა, რომლის გამოსწორებაც ახლა უწევს კულტურული მემკვიდრეობის დაცვის ეროვნულ სააგენტოს.