სენაკის მუნიციპალიტეტის სოფელ ჭალადიდში, მდინარე რიონზე წყალდიდობის შედეგად დაზიანებული ბორნის აღდგენის სამუშაოები გრძელდება.

მერის მოადგილე გრიგოლ ბაღათურიამ „ლაივპრესს“ განუცხადა, რომ ამ ხნის განმავლობაში მოსახლეობა გარესამყაროს მოწყვეტილი არ ყოფილა და მათ კომუნიკაციის პრობლემა არ შექმნიათ.

„სტიქიის მეორე დღესვე წავიდა იქ ტრაქტორი. ამოთხარა საძირკველი. ისევ უნდა ჩაიდოს საბორნე ნაგებობა, რაც იყო და რაც წყალმა წაიღო. დღეს იქ ამწე კრანია, რომელიც ატარებს სამუშაოებს. რაც შეეხება მოსახლეობის ერთმანეთში კომუნიკაციას, მოტორიანი ნავი ადგილზე ჰყავთ და პროდუქტი დასჭირდებათ თუ სხვა რამ, არავითარი პრობლემა არ არის“, - გვითხრა მერის მოადგილემ.

გრიგოლ ბაღათურიამ აღნიშნა, რომ სამუშაოებს ადგილობრივი ძალებით და მუნიციპალიტეტის ტექნიკით ახორციელებენ. რა თანხები დაიხარჯება ამ ყველაფრისთვის, ეს დაპროექტების შემდეგ გახდება ცნობილი.

მისივე თქმით, ამ ეტაპზე ბორანი იმუშავებს, თუმცა შემდეგ ჩამოვა კომისია, რომელიც დეტალურად შეისწავლის ვითარებას და სამომავლო გეგმებიც დაისახება. მათ შორის გაირკვევა, შეცვლიან თუ არა მოქმედ ბორანს.

„ამას წინასწარ ვერ გეტყვით“, - განმარტა გრიგოლ ბაღათურიამ.

7 დეკემბერს წყალდიდობის შედეგად მდინარე რიონმა ბორანის ბაგირი მოგლიჯა და სამაგრი ბოძები დააზიანა. სწორედ ამ ბორანის საშუალებით უკავშირდება გარესამყაროს 14 ოჯახი.

მისი აღდგენა მომავალ კვირას დასრულდება, მანამდე კი მოსახლეობა მოტორიანი ნავით ისარგებლებს.