„ეს მხოლოდ მე არ მტკივა" - მე-15 ბაღში მომხდარის შესახებ მშობელი საზოგადოებას მიმართავს
თეა ანჩაბაძე განცხადებაში კიდევ ერთხელ აღნიშნავს, რომ ადგილზე პროტესტი არ გამოუხატავს, რათა სხვა აღსაზრდელებისთვის დღესასწაული არ ჩაეშალა. მშობელმა შესაბამისი განმარტება „ლაივპრესთან“ მანამდეც გააკეთა და დასძინა, რომ სწორედ ამ მიზეზით არ იყვნენ დარბაზში მსხდომები მომხდარის შესახებ ინფორმირებული და არც მსგავსი რამ შეუნიშნავთ. ამბობს, რომ მისი შეშფოთება ბაღის ხელმძღვანელობას ეხებოდა.
„პირველ რიგში, არ ვარ ის ადამიანი, ვინც საკუთარი 4 წლის შვილის სიმშვიდეს, ფერად ბავშვობას და ნათელ მომავალს საპირწონედ დავდებდი საჯაროობის, პირადი ინტერესების ან სხვა მსგავსი მიზეზების სანაცვლოდ (ეს მათთვის ვინც არ მიცნობს პირადად).
მეორე, მინდა უდიდესი პატივისცემა, მადლიერება გამოვხატო იმ ათასობით ადამიანის მიმართ, ვინც პირადში მწერთ, გვეპატიჟებით ზეიმებზე, თანადგომას გვიცხადებთ, ვინც აღმოჩნდით ჩემი შვილის სახით ჩვენი საზოგადოების, აუტისტური სპექტრის მქონე ბავშვების და მათი მშობლების გულწრფელი გულშემატკივრები და მხარდამჭერები.
არ მეგონა თუ ჩემს გულისტკივილს ამდენი გამოხმაურება მოჰყვებოდა. მადლობა ადგილობრივ თვითმმართველობას, მაჟორიტარი დეპუტატის აპარატს, სახალხო დამცველის აპარატს და სხვადასხვა ინსტიტუციებს, რომლებიც მყისიერად გამოეხმაურნენ და რეაგირება მოახდინეს ფაქტზე. როგორც ვიცი, მოკვლევა მიმდინარეობს. მეც არაერთი განმარტების მიცემა მომიწია და იმედი მაქვს ყველა კითხვას გავეცი ამომწურავი პასუხი;
ერთს დავაკონკრეტებ მხოლოდ, იმ კარის მიღმა მიმდინარე ღონისძიების მონაწილე ბავშვებისთვის და მათი მშობლებისთვის არ მიგრძნობინებია, არ ამიტეხავს აყალ-მაყალი, რომ ნანუკას თანატოლებისთვის ეს ფერადი და ლამაზი დღე არ ჩაშლილიყო... (ეს მშობლების საყურადღებოდ!!!).
და კიდევ, დაბეჯითებით ვიმეორებ იმათთვის, ვინც კარების თემით მანიპულირებს - ის კარი ნამდვილად წარმოადგენს ჩემი შვილისთვის ბაღის დანარჩენ აღსაზრდელებთან კომუნიკაციის იმ ალტერნატიულ გასასვლელს, რომლითაც ის სარგებლობს მისი სპეციფიური მდგომარეობის გამო. დიახ, ზეიმის ოთახს აქვს ცენტრალური შესასვლელიც, რომლითაც ჩვენი ჯგუფის 4 ბავშვს, ბაღში რეგისტრაციის დღიდან არასოდეს უსარგებლია, (მითუმეტეს იმ დღეს), ჩემი გოგონასთვის ეს კონკრეტული კარი იყო „კარი, რომლის მიღმაც გაზაფხულია“... სწორედ ეს კარი ჩაირაზა იმ დღეს... (შესაძლებელია ეს ცალკეული შემთხვევა „ტრაგედია“ არ იყოს, ტრაგედია მიდგომაშია).
და ბოლოს, მადლიერების და კეთილი სიტყვების მეტი არაფერი მეთქმის ჩეხური ორგანიზაცია CAR ITAS -ის პროექტის, მისი მესვეურების, და პროექტის გუნდის, სპეც-პედაგოგების მიმართ - ლანა, ლალი, თაკო, გვანცა, რომლებიც ძალისხმევას და პროფესიონალიზმს არ იშურებენ ნანუკას აღზრდა-განვითარების საქმეში.
ჩემი აღშფოთება ეხებოდა ბაღის ხელმძვანელობას. უსამართლობა იქნებოდა ჩემი მხრიდან მთელი ბაგის პედ-კოლექტივზე აუგის თქმა, ჩემი მიზანი არ ყოფილა ვინმეს დასჯა, სამართლებრივი დევნა, ზიანის მიყენება და სხვა უკიდურესი ზომების მიღება, მე დედის გულწრფელი გულისტკივილი გამოვთქვი და ის, რაც პოსტს მოჰყვა, იმას ნიშნავს, რომ ეს მხოლოდ მე არ მტკივა.....“, - ნათქვამია თეა ანჩაბაძის განცხადებაში.
მეთხუთმეტე ბაღში 27 დეკემბერს მომხდართან დაკავშირებით მერიამ მოკვლევა დაიწყო. ბაღში უკვე მუშაობს აუდიტის სამსახური. მერის ლაშა გოგიას განცხადებით, კანონის წინაშე ყველა აგებს პასუხს ვისი ბრალეულობაც გამოიკვეთება. ამასთან ბაღის ადმინისტრაცია ადასტურებს, რომ კარი, რომელზეც მშობელი საუბრობს ჩაკეტილი იყო და ის არ არის მთავარი „სამოქმედო კარი“, თუმცა იქვე დასძენს, რომ ღია იყო დარბაზის ალტერნატიული შესასვლელი.