რა დროს ურემია - ახალი სამარშრუტო ხაზის მხარდამჭერი აქცია ზუგდიდში [ვიდეო]
შეკრებილების თქმით, წლების განმავლობაში მძიმე პირობებში უწევდათ მგზავრობა და ოთხთვალა ურმებს ადამიანებიც ტვირთივით გადაჰქონდათ, ახლა კი მიესალმებიან მიკროავტობუსების დანიშვნას.
აქციის მონაწილეების განცხადებით, არ აქვს მნიშვნელობა ვინ კურირებს მიკროავტობუსებს, რადგან მათთვის სასიკეთო საქმე გაკეთდა. აფხაზეთიდან იძულებით გადაადგილებული პირები არათუ მოქმედი ხაზის გაუქმებას, პირიქით, გალის მიმართულების ტრანსპორტის დანიშვნის მოთხოვნით გამოდიან.
ზუგდიდის ცენტრიდან სოფელ რუხში, აფხაზეთის ადმინისტრაციულ საზღვრამდე მოძრავი კერძო მიკროავტობუსების და ტაქსების მძღოლები, ასევე ენგურის ხიდზე მომუშავე ოთხთვალა ურმების მეპატრონეები 10 იანვარს გაიფიცნენ. სხვადასხვა სახის, დაახლოებით 30-მდე ტრანსპორტის მფლობელი აპროტესტებდა ახალი მიკროავტობუსების დაწესებას.
გაფიცულების თქმით, ახალ სამარშრუტო ხაზს არაოფიციალურად ყოფილი პარტიზანული დაჯგუფება „ტყის ძმების“ ხელმძღვანელი დათო შენგელია აკონტროლებს, რომლის დახმარებითაც და დე ფაქტო რესპუბლიკის წარმომადგენლებთან მოლაპარაკებით, 4 მიკროავტობუსი ოკუპირებულ ტერიტორიაზე შესვლას ახერხებს. იმის გამო, რომ თავად ხიდს იქით გადასვლის უფლება არ აქვთ, მგზავრები მოაკლდათ და სამუშაოს გარეშე დარჩნენ. გაფიცულები თანაბარი სამუშაო პირობების შექმნას ითხოვდნენ.