დრანდის ციხის სამი თანამშრომელი პატიმრების გაქცევის საქმეზე დამნაშავედ ცნეს
საუბარია 2016 წელს სამი მსჯავრდებულის გურამ ინაპშბას, რევაზ უგრეხელიძის და ბაჩუკა ლატარიას გაქცევის საქმეზე ბრალდებულებზე. დე ფაქტო პროკურატურის ინფორმაციით, გაქცეულებმა თბილისის მიერ კონტროლირებად ტერიტორიაზე გადასვლა მოახერხეს და მიმალვაში იმყოფებიან.
ე.წ. სასამართლოს გადაწყვეტილებით, იზოლატორის ყოფილ ორ თანამშრომელს, რაჩიკ სააკიანს და მერაბ ბოუბას ჯარიმის სახით დაეკისრათ 30 ათასი რუბლის გადახდა. ამასთან აეკრძალათ ერთი წლის განმავლობაში ე.წ. შინაგან საქმეთა სამინისტროს დაქვემდებარებაში არსებულ ნებისმიერ დაწესებულებაში მუშაობა. სამსახურებრივი უფლება-მოვალეობის გადამეტების და გულგრილობის მუხლებით ბრალდებულ, იზოლატორის ყოფილ მორიგე ბადრაგს დმიტრი აიბას დაეკისრა 50 ათასი რუბლის გადახდა და აეკრძალა დე ფაქტო რესპუბლიკის ძალოვან უწყებაში 2 წლის განმავლობაში მუშაობა.
დრანდის საგამოძიებო იზოლატორის ყოფილი უფროსი, რომელიც პატიმრების გაქცევის გამო სამსახურიდან მალევე დაითხოვეს, დე ფაქტო სასამართლომ გაამართლა. მას ბრალად ედებოდა გულგრილობა, რაც გამოიხატებოდა იზოლატორში კონტროლის ზომების არასათანადო მონიტორინგში.
დრანდის საგამოძიებო იზოლატორიდან 2016 წლის 1 ოქტომბერს სამი მსჯავრდებული გურამ ინაპშბა, რევაზ უგრეხელიძე და ბაჩუკა ლატარია გაიქცა. მათ შორის ლატარიასთვის ეს უკვე მეორე გაქცევა იყო ციხიდან. როგორც დე ფაქტო შინაგან საქმეთა სამინისტრო იუწყებოდა, მსჯავრდებულებმა გაქცევა მოახერხეს იმის გამო, რომ საკნის კარები ჩაკეტილი არ იყო. შედეგად ისინი ციხის ადმინისტრაციის განყოფილებაში გადავიდნენ, ავიდნენ მეორე სართულზე, გატეხეს ფანჯრის გისოსები და გავიდნენ დაწესებულების ეზოში.
ბაჩუკა ლატარიას ოჩამჩირის ე.წ. სასამართლომ 2014 წელს 12 წლით თავისუფლების აღკვეთა მიუსაჯა ადამიანის გატაცების გამო. დე ფაქტო შს სამინისტროს ცნობით, დაკავებული თანამზრახველებთან ერთად გატაცებულის გათავისუფლების სანაცვლოდ გამოსასყიდ თანხას ითხოვდა.
1977 წელს დაბადებულ გურამ ინაპშბას 15 წელი ჰქონდა მისჯილი ცეცხლსასროლი იარაღის გამოყენებით ადამიანის წინასწარ განზრახვით მკვლელობის გამო.
1975 წელს დაბადებულ რევაზ უგრეხელიძეს გაგრის ე.წ. სასამართლომ 11 წლით თავისუფლების აღკვეთა მიუსაჯა ადამიანის მკვლელობის მცდელოლბისთვის და სხვისი ქონების გაფლანგვა-მითვისებისთვის.