გალში 107 ე.წ. პასპორტი და 1 500-ზე მეტი ბინადრობის მოწმობა გაიცა
მანარგიას ცნობით, მიუხედავად იმისა, რომ გალის რიონში წლების წინ გაცემული პასპორტების უმეტესობა დე ფაქტო რესპუბლიკის პარლამენტმა ძალადაკარგულად ჯერ კიდევ 2013 წელს გამოაცხადა, დაახლოებით 17 ათასი მოქალაქე ძველი დოკუმენტით ჯერ კიდევ სარგებლობს.
რაც შეეხება ე.წ. დროებითი ბინადრობის მოწმობებს, მანარგიას განცხადებით, მსგავსი დოკუმენტაცია ამ ეტაპზე მხოლოდ გალის მცხოვრებლებზე გაიცა. მომავალში კი მისი დარიგება სხვა რაიონებშიც იგეგმება. მისი ინფორმაციით, ამ დროისთვის ბინადრობის მოწმობა გადაეცა 1 573 გალელს და განიხილება ამ მოთხოვნაზე 4 447 განაცხადი.
„პასორტებისა და დროებითი ბინადრობის მოწმობების გაცემა ხდება კანონით დადგენილი ნორმების მკაცრად დაცვით“, - ირწმუნება ედუარდ მანარგია.
დე ფაქტო რესპუბლიკის ძველი პასპორტის ახლით ჩანაცვლების პროცესი 2016 წლის ბოლოდან დაიწყო. პროცესს წინ უძღოდა 2015 წელს გალში „გაყალბებული პასპორტების“ ამოღების ფაქტი. მაშინ ე.წ. პროკურატურაში განაცხადეს, რომ გალის საპასპორტო განყოფილების თანამშრომლებმა „აფხაზეთის მოქალაქეობის შესახებ კანონი“ დაარღვიეს და გალის მცხოვრებლებზე უკანონოდ გასცეს პასპორტი.
ამასთან, აფხაზეთის დე ფაქტო რესპუბლიკის პარლამენტმა 2017 წლის 30 მარტს მიიღო „კანონი“, რომელიც რეგიონში მცხოვრები „აფხაზეთის მოქალაქეობის არ მქონე პირის“ სამართლებრივ სტატუსს განსახზღვრავს. ამ გადაწყვეტილებით, დროებითი ბინადრობის მოწმობა მიენიჭება მეტწილად გალის მცხოვრებლებს, რადგან მათ უმრავლესობას არ გააჩნია „აფხაზეთის მოქალაქეობა“ და წლების განმავლობაში სამართლებრივი სტატუსის არქონის მიზეზით ეკრძალებოდათ „არჩევნებში“ მონაწილეობის მიღებაც.