დადიანების ეზოში მხედარი ქალის ბრინჯაოს სკულპტურა დაიდგა [ფოტო]
დადიანების ისტორიულ-არქიტექტურული მუზეუმის ეზოში ცაიშის სამაროვანზე
მერიის ძეგლთა დაცვის განყოფილების უფროს ლაშა ჯიქიას განმარტებით, ფაქტობრივად ეს წარმოადგენს პატარა იდოლეტს, ქანდაკებას, რომელსაც წარმართულ პერიოდში ღმერთებს სწირავდნენ. სკულპტურაც ამ სარიტუალო წესს ასახავს. მანვე „ლაივპრესს“ უთხრა, რომ ეს აღმოჩენა მიუთითებს შემდეგზე - კოლხურ მითოლოგიურ რწმენა-წარმოდგენებში მთავარი და დომინანტი ქალღვთაება იყო, რაც თავის მხრივ ქალის კულტის გამორჩეულობასაც გულისხმობს:
„ყველაზე მეტად ქალის ინვენტარებია წარმოდგენილი იმ დროინდელ სამარხებში. სწორედ ქალს ეკავა დომინანტი ადგილი და სავარაუდოდ ეს ასახავს ნაყოფიერების ქალღმერთისადმი შეწირულ იდოლას“.
ლაშა ჯიქიას თქმით, ცაიშში მხედარი ქალის ქანდაკება 2005 წელს აღმოაჩინეს, თუმცა მანამდე, თითქმის ნახევარი საუკუნით ადრე მსგავსი ტიპის სკულპტურა საბერძნეთის ერთ-ერთ კუნძულზე იპოვეს. მაშინ, მერიის წარმომადგენლის განმარტებით, ამერიკელმა მეცნიერმა განაცხადა, რომ ეს არ იყო ელინური მოვლენა, და ფაქტი კოლხურ-ყობანურ კულტურას დაუკავშირა.
„მართლაც, ცაიშსა და ერგეტაში დაფიქსირდა მსგავსი ტიპის ქანდაკებები. დადასტურდა, რომ ეს არის წმინდა ადგილობრივი მოვლენა, კოლხური ფენომენი“, - აღნიშნა ლაშა ჯიქიამ.
მისივე თქმით, ცხენზე ამხედრებული ქალის სკულპტურა უახლოეს დღეებში გაიხსნება. მანამდე ქანდაკებამდე მისასვლელ გზას მოაწყობენ.
ცაიშში მსგავსი კიდევ რვა ქანდაკებაა აღმოჩენილი. ზოგი თასის, ზოგიც კიდევ ბავშვის გარეშე. მათ ასლებს ზუგდიდის შემოსასვლელში, ცაცხვის ადმინისტრაციულ ერთეულში განათავსებენ სკვერში, რომელიც საგანგებოდ მოეწყობა.
ზუგდიდში, დადიანების ეზოს მიმდებარედ კოლხური ბრინჯაოს კულტურის ამსახველი ქალ-ღვთაების ქანდაკება რომ განთავსდებოდა, ამის შესახებ ჯერ კიდევ შარშან, ივლისის თვეში გამართულ შეხვედრაზე მერიის კულტურისა და ძეგლთა დაცვის განყოფილების მაშინდელმა უფროსმა ბესიკ არახამიამ განაცხადა. მისი თქმით, ის იდენტური იქნებოდა სოფელ ცაიშში არქეოლოგიური გათხრების შედეგად აღმოჩენილი ძვ. წ.აღ-ით VIII-VII საუკუნით დათარიღებული ბრინჯაოს ქალ-ღვთაების ქანდაკების.