პრემიერი: რეგიონებში უნდა იყოს გადაწყვეტილების მიღების ძალაუფლება
„მე დიდი ენთუზიაზმით ვუყურებ ამ რეფორმას. ამ რეფორმის მიღების მიზანი უნდა იყოს ის, რომ რეგიონებში იყოს როგორც გადაწყვეტილების მიღების ძალაუფლება, ასევე შესაბამისი რესურსი ამ გადაწყვეტილების მიღების და აღსრულებისთვის. ჩვენი ნატვრა იქნება ნამდვილად ის, რომ საქართველოში საუკეთესო განათლების მქონე ახალგაზრდებს ჰქონდეთ სურვილი, მონაწილეობა მიიღონ ადგილობრივი თვითმმართველობის ხელისუფლებებში და ჰქონდეთ უდიდესი მოტივაცია, რომ რეგიონულ განვითარებას შეუწყონ ხელი“, - განაცხდა გიორგი კვირიკაშვილმა.
დღეს პარლამენტში საქართველოს პარლამენტის თავმჯდომარე ირაკლი კობახიძე და პრემიერ-მინისტრი ადგილობრივი თვითმმართველობისა და დეცენტრალიზაციის სტრატეგიულ ეროვნულ ხედვას წარადგენენ. სხდომას საქართველოს მთავრობის, პარლამენტის, სამოქალაქო საზოგადოების, დიპლომატიური კორპუსისა და საერთაშორისო ორგანიზაციების წარმომადგენლები ესწრებიან.
ღონისძიებაში ასევე მონაწილეობენ თბილისის მერი, ადგილობრივ თვითმმართველობათა ეროვნული ასოციაციის პრეზიდენტი, კახა კალაძე; საქართველოში გაერო-ს განვითარების პროგრამის (UNDP) ხელმძღვანელი ნილს სკოტი; ავსტრიის ელჩი საქართველოში არად ბენკო და საქართველოში შვეიცარიის ელჩი ლუკას ბეგლინგერი.
საქართველოს პარლამენტის ინფორმაციით, დეცენტრალიზაციისა და ადგილობრივი თვითმმართველობის ახალი ეროვნული ხედვა რეგიონული და ადგილობრივი განვითარების მიმდინარე რეფორმის ნაწილია, რომელსაც აქტიურად უჭერენ მხარს საქართველოს საერთაშორისო პარტნიორები, მათ შორის გაერო-ს განვითარების პროგრამა (UNDP) და შვეიცარიისა და ავსტრიის მთავრობები. დეცენტრალიზაციისა და ადგილობრივი თვითმმართველობის ახალი ეროვნული ხედვის წარდგენის შემდეგ, სტრატეგიისა და სამოქმედო გეგმის შემუშავება იგეგმება, რომელსაც საქართველოს პარლამენტი 2018 წელს დაამტკიცებს.