ზუგდიდის მუნიციპალიტეტის საკრებულოში იქმნება ახალი ფრაქცია „ევროპული საქართველო“. შესაბამისი განცხადებით, საკრებულოს იურიდიულ, სამანდატო და ადამიანის უფლებათა დაცვის საკითხთა კომისიას დეპუტატმა ბათლომე შელიამ მიმართა. როგორც მან „ლაივპრესს“ განუცხადა „ევროპული საქართველოს“ თავმჯდომარე თავად არის, მისი მოადგილე კი „ნაციონალური მოძრაობის“ ყოფილი წევრი გელა თოლორაია იქნება. ფრაქციაში მესამე წევრი „ევროპული საქართველოს“ წარმომადგენელი ირაკლი ღურწკაიაა.

ბათლომე შელიას თქმით, გელა თოლორაია ფრაქციაში გაწევრიანების პარალელურად გახდა პარტია „ევროპული საქართველოს“ წევრიც, რადგან იზიარებს მის პოლიტიკურ შეხედულებებს.

დეპუტატის თქმით, ახალი ფრაქციის დარეგისტრირების შესახებ განცხადება კომისიამ უკვე ცნობად მიიღო.

საკრებულოში „ერთიანი ნაციონალური მოძრაობის“ პროპორციული სიით შესული გელა თოლორაია ჯერ არცერთ სხდომას არ დასწრებია. 15 თებერვალს გამართულ სხდომაზე კი მისთვის დეპუტატის ხარჯების ანაზღაურების გაცემის საკითხმა დაპირისპირება გამოიწვია და განცხადება გააკეთა ფრაქცია „ნაციონალური მოძრაობის“ თავმჯდომარემ. ანა წითლიძის თქმით, თოლორაია არის „მოღალატე“ რადგან საკუთარ პარტიაზე უარი თქვა და არ აქვს მორალური უფლება იყოს საკრებულოს წევრი.

ადგილობრივი თვითმმართველობის არჩევნებში ენმ-ის მაჟორიტარობის კანდიდატები, გელა თოლორაია, ლევან მაქაცარია, გოდერძი კუკავა და გიორგი თოფურია, რომლებმაც კენჭისყრის დღემდე ცოტა ხნით ადრე კანდიდატურები მოიხსნეს, ენმ-დან გაირიცხნენ. მაშინ კანდიდატების გადაწყვეტილება მოულოდნელი აღმოჩნდა ენმ-ის ლიდერებისთვის. გელა თოლორაიას ამ საკითხზე კომენტარი არ გაუკეთებია. ის არ პასუხობს ჟურნალისტების ზარებს. მასთან გასაუბრება „ლაივპრესმა“ ვერც ამჯერად მოახერხა.