აფხაზეთში რუსეთის პრეზიდენტის არჩევნებში ვლადიმირ პუტინის სასარგებლოდ ხმა მისცა 39 ათას 427-მა ამომრჩეველმა, რაც კენჭისყრაში მონაწილეთა 94,21%-ია. მეორე ადგილზე გავიდა პაველ გრუდინინი 1029 ხმით (2,46%). ვლადიმირ ჟირინოვსკი - 654 ხმა (1,56%). სერგეი ბაბურინი - 286 ხმა (0,68%). ქსენია სობჩაკი - 247 ხმა (0,59%), მაქსიმ სურაიკინი - 98 ხმა (0,24%), გრიგორი იავლისკი - 65 ხმა (0,15%) და ბორის ტიტოვი - 45 ხმა (0,1%).

„აფსნიპრესის“ ცნობით, რუსეთის პრეზიდენტის არჩევნების შედეგებზე პრესკონფერენციაზე განაცხადა რუსეთის სრულუფლებიანმა ელჩმა დე ფაქტო აფხაზეთის რესპუბლიკაში, სემენ გრიგორევმა.

აფხაზეთში სულ 20 სარჩევნო უბანი გაიხსნა. კენჭისყრაში მონაწილეობა 41 ათას 849 ადამიანმა მიიღო.

„აფხაზეთში ვლადიმირ პუტინმა 20%-ით მეტი ხმა მიიღო, ვიდრე რუსეთის ტერიტორიაზე“, - აღნიშნა სემენ გრიგორევმა.

საქართველოს საგარეო საქმეთა სამინისტრომ დაგმო რუსეთის ფედერაციის საპრეზიდენტო არჩევნების ჩატარება ოკუპირებულ ტერიტორიებზე და ამ ფაქტს ფაქტობრივი ანექსიისკენ გადადგმული კიდევ ერთი ნაბიჯი უწოდა.

წინასწარი მონაცემებით, ვლადიმირ პუტინმა ხმების 76,67% მიიღო.