ამ წუთებში იმ ადგილის მიმდებარედ, სადაც „მესტიაჭალაჰესი“ უნდა აშენდეს, საპროტესტო აქცია მიმდინარეობს. ეკონომიკის სამინისტროს მოადგილესთან, რომეო მიქაუტაძესთან შეხვედრის შეთანხმების გარეშე დასრულების შემდეგ, ადგილობრივმა მცხოვრებლებმა მშენებარე ობიექტთან გადაინაცვლეს. მათი უკმაყოფილების მიზეზი ტერიტორიაზე მძიმე ტექნიკის შემოყვანის მცდელობა და დაწყებული სამშენებლო სამუშაოს დასრულებაა, რასაც ეწინააღმდეგებიან. შეკრების ერთ-ერთმა მონაწილემ ნარგიზ ნიგურიანმა, რომელიც ამავდროულად მესტიის მერის კულტურის სამსახურის უფროსია, „ლაივპრესს“ უთხრა, რომ მათი მოთხოვნაა ტექნიკა მანამ არ შემოიყვანონ, სანამ თბილისში 24 მარტს დაგეგმილი შეხვედრა არ გაიმართება, რომელშიც მონაწილეობას სხვადასხვა უწყების წარმომადგენლებთან ერთად, ექსპერტებიც მიიღებენ ორივე მხრიდან. ამ დრომდე კი, მისივე განმარტებით, ნდობის ფაქტორი მშენებლობის მიმართ იქნება დაბალი, რადგან ქვეყანაში ბევრია უხარისხო მშენებლობა. სწორედ ამის გამო კითხვები ლოგიკურად ჩნდება.

„ვეწინააღმდეგებით ჰესების მშენებლობას, ვეწინააღმდეეგბით ღვარცოფულ მდინარეებზე ჰესების მშენებლობას. ზოგადად ნორმალური მწვანე ჰესების მშენებლობას არ ვეწინააღმდეგებით. ქვეყნას სჭირდება ენერგია და ეს კარგად გვესმის“, - აღნიშნა აქციის მონაწილემ.

მისივე თქმით, სწორედ მძიმე ტექნიკის შემოყვანის საკითხს მოჰყვა ეკონომიკის სამინისტროს წარმომადგენლებთან დაპირისპირება, რომლებმაც განუმარტეს მოსახლეობას, რომ თუ სამუშაოებს არ გააგრძელებენ, ყოველდღიური ზარალის რაოდენობა მოიმატებს.

ნარგიზ ნიგურიანმა საპროტესტო აქციებით თბილისში გადმონაცვლებაც არ გამორიცხა.

მერიის თანამშრომელს ასევე აქვს მოლოდინი და ინფორმაცია, რომ საპროტესტო აქციებში მონაწილეობა შესაძლოა მისი სამსახურიდან გათავისუფლებით დასრულდეს. ამბობს, რომ დათხოვნა კიდევ რამდენიმე პირს შეეხება. თუმცა ამ ეტაპზე უფრო კონკრეტულად ამ თემაზე საუბარი არ სურს.

„მესტია-ჭალაჰესის“ მშენებლობის მოწინააღმდეგეთა შეხვედრა მოსახლეობას და ეკონომიკის მინისტრის მოადგილესა და georgian global utilities გენერალურ დირექტორს შორის გაიმართა.

ჰესების მშენებლობის შეჩერების მოთხოვნით მესტიაში საპროტესტო აქცია არაერთხელ გაიმართა. ბოლო შეკრება სეტის მოედანზე 4 მარტს შედგა. აქციის მონაწილეების თქმით, ჰესები სვანეთს ეკოლოგიური თვალსაზრისით პრობლემებს შეუქმნის. აქციას მოგვიანებით მესტიის მერია გამოეხმაურა და მოსახლეობა გააფრთხილა, რათა პოლიტიკურმა პარტიებმა არ გამოიყენონ ისინი საკუთარი მიზნებისთვის.

საპროტესტო გამოსვლების გამო განცხადება გაავრცელა დაბა მესტიაში ჰესების მშენებელმა კომპანიამ „სვანეთი ჰიდრო“. კომპანიის მიერ „ლაივპრესისთვის“ მოწოდებული ინფორმაციის თანახმად „მესტიაჭალა 1“ და მესტიაჭალა 2“ არადაგუბებითი ტიპის ჰესებს განეკუთვნება და შენდება თანამედროვე ტექნოლოგიური სტანდარტების სრული დაცვით. შესაბამისად ისინი ეკოლოგიურად უსაფრთხოა და მნიშვნელოვანია საქართველოსთვის, როგორ ენერგოდამოუკიდებლობის, ისე განახლებადი ენერგიის განვითარების კუთხით.