სადამკვირვებლო მისია გალის შეხვედრის მონაწილეებს მოუწოდებს ცხელი ხაზი მაქსიმალურად გამოიყენონ
ევროკავშირის სადამკვირვებლო მისიის შეფასებით, შეხვედრა კონსტრუქციულ ატმოსფეროში გაიმართა, ყველა მონაწილე შეთანხმდა, რომ აფხაზეთის ადმინისტრაციულ საზღვართან ადგილზე არსებული უსაფრთხოების მდგომარეობა 2018 წლის 27 თებერვალს ჩატარებული წინა შეხვედრის შემდეგ შედარებით სტაბილური იყო, ახალ სერიოზულ ინციდენტებს ადგილი არ ქონია. მათივე ინფორმაციით, მონაწილეებმა დადებითად შეაფასეს ევროკავშირის სადამკვირვებლო მისიის მიერ ოპერირებადი ცხელი ხაზი, როგორც ინციდენტების მართვის არსებითი ინსტრუმენტი.
გალის შეხვედრის მონაწილეები ენგურის ხიდთან. ფოტო: "ლაივპრესი"
„ევროკავშირის სადამკვირვებლო მისიამ მოუწოდა ყველა მონაწილეს გააგრძელონ ცხელი ხაზის სრული გამოყენება და ყველა შესაძლო ზომა მიიღონ ადმინისტრაციული საზღვრის გასწვრივ სტაბილურობის და დაკავებათა საკითხებთან დაკავშირებული ინფორმაციის გასაცვლელად.
ინციდენტების პრევენციისა და მათზე რეაგირების მექანიზმის ფორმატში კვლავ განიხილეს ბ-ნ ოთხოზორიას მკვლელობის საკითხი, რასაც პროგრესი არ მოყოლია. მონაწილეებმა ინფორმაცია გაცვალეს ბოლოდროინდელ დაკავებათა შესახებ - დადებითად შეფასდა ჰუმანიტარული მიდგომის საფუძველზე დაკავებულის ბოლოდროინდელი ადრეული გათავისუფლება.
კახაბერ ქემოკლიძე. ფოტო: "ლაივპრესი"
დღის წესრიგის რეგულარული საკითხის ფარგლებში სენსიტიურ ღონისძიებებთან წინასწარი გაფრთხილების თაობაზე ევროკავშირის სადამკვირვებლო მისიამ ადმინისტრაციული საზღვრის გასწვრივ ნდობის აღდგენის მიზნით სამხედრო და უსაფრთხოების ძალების ქმედებების, ისევე როგორც სხვა შესაბამისი ღონისძიებების შესახებ წინასწარ გაფრთხილებისა და გამჭვირვალობის მნიშვნელობას ხაზი გაუსვა“, - ნათქვამია განცხადებაში, რომელსაც ევროკავშირის სადამკვირვებლო მისია საკუთარ ვებ-გვერდზე ავრცელებს.
გაეროს თავმჯდომარეობით და ევროკავშირის სადამკვირვებლო მისიის მონაწილეობით, ინციდენტების პრევენციისა და მათზე რეაგირების მექანიზმის ფარგლებში რიგით 54-ე შეხვედრა გალში 21 მარტს ჩატარდა. განხილულ საკითხებზე ქართველ ჟურნალისტებს ინფორმაცია თბილისის დელეგაციის ხელმძღვანელმა კახაბერ ქემოკლიძემ მიაწოდა. მომდევნო შეხვედრა 25 აპრილს ჩაინიშნა.
გალში გამართული შეხვედრის ამსახველი ფოტო ეკუთვნის ევროკავშირის სადამკვირვებლო მისიას.