საქართველოს საგარეო საქმეთა სამინისტრო მიმართავს მოქალაქეებს, ერთად გაუფრთხილდნენ ევროინტეგრაციის გზაზე მიღწეულ ყველა წარმატებას, მათ შორის დაიცვან ევროკავშირის ქვეყნებში უვიზო მიმოსვლის წესები, მისცენ საკუთარ თავს შესაძლებლობა, მომავალშიც შეუფერხებლად ისარგებლონ ამ სიკეთით და ერთად აშენონ ქვეყნის ევროპული მომავალი.

დღეს ერთი წელი შესრულდა მას შემდეგ, რაც საქართველოს მოქალაქეებს შესაძლებლობა მიეცათ, უვიზოდ იმგზავრონ ევროპაში. განცხადების მიხედვით, მართალია არსებობს ცალკეული გამოწვევები, მაგრამ კომპლექსური ღონისძიებებით, ერთიანი მიდგომით და საზოგადოების აქტიური მხარდაჭერით ამ გზაზე არსებული ყველა გამოწვევა დაიძლევა. სამინისტროს თქმით, ვიზალიბერალიზაცია მარტო მთავრობის ძალისხმევის და მასშტაბური რეფორმების შედეგი არ არის, არამედ ეს ქართველი ხალხის ისტორიული არჩევანიცაა.

„ევროკავშირის ქვეყნებში უვიზო მიმოსვლას, ჩვენთვის, პრაქტიკული ასპექტის გარდა უდიდესი პოლიტიკური მნიშვნელობა აქვს, რადგან საქართველო ამ ნაბიჯით კიდევ უფრო დაუახლოვდა ევროპულ ოჯახს, ვროკავშირის და მისი წევრი ქვეყნების მხრიდან მოხდა საქართველოს, როგორც სანდო და ღირსეული პარტნიორის აღიარება და ჩვენ მივიღეთ კიდევ ერთხელ მტკიცე მხარდაჭერა ჩვენს ევროპულ მისწრაფებებში.

საქართველო, სავიზო ლიბერალიზაციის შემდეგაც აგრძელებს შესაბამისი ვალდებულებების პირნათლად შესრულებას და რეფორმების გატარებას. გასული წლის 20 დეკემბერს ევროკომისიამ უვიზო მიმოსვლის შეჩერების მექანიზმის შესაბამისად გამოაქვეყნა პირველი ანგარიში სავიზო რეჟიმის ლიბერალიზაციის შესახებ. ანგარიში დადებითად აფასებს მთავრობის ძალისხმევას და ხაზს უსვამს, რომ საქართველო აგრძელებს სავიზო რეჟიმის ლიბერალიზაციის მოთხოვნების შემდგომ მდგრად იმპლემენტაციას“, - ნათქვამია განცხადებაში.

სამინისტროს თქმით, უვიზო მიმოსვლის პირობებში მოქალაქეებისათვის ხელმისაწვდომი გახდა შესაძლებლობები, რომლებიც უკავშირდება დაუბრკოლებლად მოგზაურობას ევროპის ქვეყნებში. მაგალითად, როგორიცაა ტურიზმის განვითარება, ახალი ბიზნეს-კავშირების გაღრმავება, სტუდენტების გაცვლითი პროგრამების გააქტიურება, პროფესიონალებს შორის ჩამოყალიბებული პარტნიორული კავშირები და ზოგადად, გაღრმავებული ხალხთაშორისი ურთიერთობები.

უწყების ინფორმაციით, ერთი წლის განმავლობაში, ევროპულ ქვეყნებში უვიზოდ მოგზაურობით უკვე 250 000-ზე მეტმა ადამიანმა ისარგებლა.

სამინისტროს განცხადებით, ქვეყნის საბოლოო მიზანი ევროკავშირის წევრობაა. ამიტომ, მნიშვნელოვან ძალისხმევას მიმართავენ, რათა მაქსიმალურად გამოიყენონ შესაძლებლობები, რასაც მათ ევროკავშირთან ასოცირების შეთანხმება და „აღმოსავლეთ პარტნიორობაში“ მონაწილეობა სთავაზობს.

„შედეგად, ევროპული დღის წესრიგი ჩვენი ქვეყნის არა მხოლოდ საგარეო, არამედ შიდა პოლიტიკის პრიორიტეტადაც იქცა.

მოგეხსენებათ საქართველოს მთავრობა ამჟამად მუშაობს საგზაო რუკაზე, რომლის მიზანია ყველა არსებული მექანიზმისა თუ ინსტრუმენტის გამოყენებით მივაღწიოთ მაქსიმალურ ინტეგრაციას ევროკავშირში“, - ნათქვამია საგარეო საქმეთა სამინისტროს განცხადებაში.